Ekseter qalasynda soǵystan qalǵan qýatty avıabombany jardy

LONDON. QazAqparat – Jarylys tehnıkteriniń komandasy juma kúni Anglııanyń Ekseter qalasynda Ekinshi dúnıejúzilik soǵystan qalǵan qýatty avıabombany jaryp jiberdi. Bul týraly QazAqparat jergilikti polıtsııa qyzmetiniń Twitter-degi málimdemesine silteme jasap habarlaıdy.

«Ekseter ýnıversıtetiniń mańynan tabylǵan bomba jaryp jiberildi. 400 metr radıýsyndaǵy jerdi qorshaý túni boıy saqtalady, sondyqtan turǵyndar óz úılerine qaıtyp oralmaýy tıis», - delingen habarlamada.

Uzyndyǵy 2 metrden asatyn oq-dáriniń joǵary qýattylyǵyna baılanysty, qaýipsizdikti qamtamasyz etý maqsatynda ýnıversıtettik kampýs aýmaǵynda jáne onyń mańynda turyp jatqan birneshe myń adamdy qaýipsiz jerge shyǵarý jumysy júrgizildi. Evakýatsııalanǵandardyń arasynda bul JOO-nyń júzdegen stýdenti bar.

Polıtsııa jarııalaǵan vıdeoda bomba jarylǵan sátten keıin jarqyldaý men ondaǵan metrge kóterilgen qara tútin baǵanasy kórinip tur. Jergilikti turǵyndar jarylystyń qalanyń shalǵaı bólikterde de estilip, úıdegi zattardyń qozǵalǵanyn aıtty.

Ekinshi dúnıejúzilik soǵys jyldarynda Ulybrıtanııanyń ÁÁK bazasy ornalasqan Ekseter jappaı bombalaýǵa ushyraǵan.