Tımýr Toqtabaev 7 jylǵa sottalyp, qymbat múlikteri tárkilendi

Burynǵy vıtse-mınıstr T. Toqtabaevqa qatysty qylmystyq isti tergeý sheńberinde memleketke Qostanaı oblysyndaǵy «Shevchenkovskoe» biregeı ken orny qaıtaryldy, dep habarlaıdy Kazinform.

Sybaılas jemqorlyqqa qarsy is-qımyl agenttiginiń málimetinshe, ken ornynda nıkel (1,075 mln tonna) jáne kobalt (585,9 myń tonna) qory bar. Paıdaly qazbalar qorynyń quny 5,6 trln teńgeden asady.

"Bıylǵy 27 qazanda Astana qalasynyń qylmystyq ister jónindegi aýdanaralyq sotynyń T.Toqtabaevqa qatysty úkimi jarııalandy. Ol paıdaly qazbalardyń iri qory bar ken oryndaryn onymen úlestes tulǵalarǵa berý kezinde aýyr zardaptarǵa ákep soqtyrǵan laýazymdyq ókilettikterdi teris paıdalanǵany úshin kináli dep tanyldy", - dep jazdy Antıkordan.

Toqtabaevqa 7 jyl bas bostandyǵynan aıyrý jazasy taǵaıyndaldy jáne memlekettik qyzmet atqarý quqyǵynan, «Eren eńbegi úshin» memlekettik nagradasynan aıyrylyp, qymbat múlikteri tárkilendi. Olar:

1. Almaty qalasy Bostandyq aýdany Kókshoqy shaǵyn aýdany mekenjaıynda ornalasqan jer ýchaskesi;
2. Almaty qalasy Bostandyq aýdany Almaty baý-baqsha seriktestigi mekenjaıynda ornalasqan turǵyn úı;
3. 2021 jyly shyqqan «Mercedes-Benz Maybach S580 4MATIC» markaly avto;
4. 2021 jyly shyqqan «Bentley Bentayga V8» markaly avto.
5. On úsh kommertsııalyq uıymnyń qatysý úlesi.

Sot úkimi zańdy kúshine engen joq.

Sybaılas jemqorlyqqa qarsy qyzmet aktıvterdi qaıtarý boıynsha jumysty jalǵastyrýda.