Eks-tergeýshi Olesıa Keksel adam azaptaýǵa qatysy bar degen kúdikke ilindi

ASTANA. KAZINFORM – Sybaılas jemqorlyqqa qarsy is-qımyl ulttyq bıýrosy Tergeý departamenti basshysynyń burynǵy orynbasary Olesıa Keksel adam azaptaýǵa qatysy bar degen kúdikke ilindi. Bul aqparatty QR Bas prokýratýrasy rastady, dep habarlaıdy Kazinform agenttiginiń tilshisi.

– 2025 jyldyń 4 shildesinde Sybaılas jemqorlyqqa qarsy is-qımyl ulttyq bıýrosy Tergeý departamenti basshysynyń burynǵy orynbasary Keksel O.I. QR Qylmystyq kodeksiniń 146-baby 2-bóliginiń 1 jáne 2-tarmaqtarynda kózdelgen qylmysty («Azaptaý») jasaýda kúdikti dep tanyldy, - dep jazylǵan habarlamada.

Eske sala keteıik, 2019 jyly Bas prokýratýraǵa bir azamat ony tergeýshiler ózine qarsy kýálik berýge májbúrlegenin aıtyp, shaǵym túsirgen bolatyn. Bul shaǵymda sol kezdegi Arnaıy prokýrorlar qyzmetiniń burynǵy basshysy Olesıa Kekseldiń de aty atalǵan. 

Alaıda sol kezde ІІM bul iste qylmystyq quram joq dep, tergeýdi toqtatqan edi.

Olesıa Keksel QR burynǵy Densaýlyq saqtaý mınıstri Jaqsylyq Dosqalıev, burynǵy premer-mınıstr Serik Ahmetov, Densaýlyq saqtaý mınıstrliginiń Farmatsııa komıteti tóraǵasynyń burynǵy mindetin atqarýshy Larısa Pak, sondaı-aq QR Ulttyq ekonomıkasynyń burynǵy mınıstri Qýandyq Bıshimbaevtyń isterin tergegen.