Eks-sýdıa Svetlana Jolmanovaǵa qatysty is: prokýror aıyptaý aktisin oqydy
ALMATY. KAZINFORM — Almatyda Medeý aýdandyq sotynyń burynǵy sýdıasy Svetlana Jolmanovanyń isi boıynsha sot otyrysy ótip jatyr.
Aıta keteıik, Svetlana Jolmanova sot otyrysyna qatysýdan bas tartqandyqtan, aldyn ala tyńdalym onyń qatysýynsyz ótip jatyr.
Іs №2 Medeý aýdandyq sotynda sýdıa Qanat Árinovtyń tóraǵalyǵymen qaralyp jatyr.
Eks- sýdıa Svetlana Jolmanovaǵa QR qylmystyq kodeksiniń 190-baby 4-bóliginiń 2-tarmaǵy (asa iri mólsherdegi alaıaqtyq) boıynsha aıyp taǵyldy.
Sot otyrysynda prokýror Raýshan Abdýlla aıyptaý aktisin oqydy.
Prokýror málimetinshe, aıyptalýshy 2021 jyldan bastap jyljymaıtyn múlik satyp alýǵa jáne tenderlik jobalarǵa qatysýǵa járdemdesý syltaýymen, aldaý jáne senimge qııanat jasaý arqyly azamattardyń mıllıondaǵan teńgesin qoldy qylǵan.
— Ol jábirlenýshileriniń bárine Janar esimdi qurbysyn jıi ataǵan. Ol sol kezde Almaty qalasynyń ákimi bolǵan Baýyrjan Baıbektiń áıeli,— delingen prokýrordyń aıyptaý aktisinde.
Tergep-tekserý barysynda qylmystyq árekettiń 48 epızody anyqtalyp, olar bir iske biriktirildi. Búgin prokýror 48 epızodtyń tek 16-yn qana oqyp úlgerdi.
Kelesi sot otyrysy 21,22,23 jáne 24 sáýirge belgilendi.
Osyǵan deıin sottalýshy Svetlana Jolmanovaǵa qatysty sot otyrysy bes ret keıinge shegerilgen bolatyn.
Buǵan deıin QR Bas prokýratýrasy Jolmanovanyń isi sotqa joldanǵany týraly habarlaǵan bolatyn.
Eske salaıyq, byltyr eks-sýdıasy Svetlana Jolmanova ustalǵany týraly jazǵanbyz.
Alǵash ret almatylyq sýdıa 2021 jyly alaıaqtyq jasady degen kúdikke ilingen.