Eks-sýdıa Aıgúl Saılybaevanyń isi: tergeý áli aıaqtalǵan joq

ASTANA. KAZINFORM — Germanııa prokýratýrasy byltyr maýsym aıynda qaza tapqan otandasymyz Aıgúl Saılybaeva isine qatysty Kazinform tilshisiniń resmı saýalyna jaýap berdi.

- Sizdiń suraýyńyzǵa oraı aıtarym: tergeý jalǵasyp jatyr, atap aıtqanda, qosymsha nusqalardy taldaý qajet. Osyǵan baılanysty tergeýdiń aıaqtalýy qazirgi ýaqytta boljanbaıdy, ázirge eshqandaı tutqyndaý júrgizilgen joq, – dedi Darmshtadt qalasynyń aǵa prokýrory, baspasóz hatshysy Robert Hartmann.

Aıgúl Saılybaeva – Astana qalasy Saryarqa aýdanynyń burynǵy sýdıasy, «Bolashaq» baǵdarlamasynyń túlegi. 

Eske salaıyq, ótken jyldyń maýsym aıynda Germanııada eks-sýdıa Aıgúl Saılybaevanyń zorlyq-zombylyq belgisi bar máıiti tabylǵan bolatyn.

40 jastaǵy Aıgúl Saılybaeva Sheffıldte (Anglııa) bilim alyp, keıin Astanada sýdıa bolyp jumys istegen. Sońǵy jyldary ol kúıeýi, qyzy jáne enesimen birge Germanııanyń Benshaım qalasynda turǵan.

Onyń denesi qala shetinen tabyldy. BAQ derekterine sáıkes, marqumnyń qolynda, moınynda jáne betinde pyshaq jaraqattary bolǵan.

Sonymen qatar, Aıgúl Saılybaevamen birge onyń 49 jastaǵy enesi Natalıa Dontsova da joǵalyp ketkeni belgili boldy. Ol 4 maýsym kúni nemeresin balabaqshadan alyp, úıine ákelgen. Sol ýaqyttan beri Natalıa Dontsovadan esh habar joq.

Aıta ketelik Eks-sýdıa Aıgúl Saılybaevanyń isi boıynsha marqumnyń enesine halyqaralyq izdeý jarııalanǵan edi.