Eks-sýdıa Aıgúl Saılybaevanyń isi: marqumnyń enesine halyqaralyq izdeý jarııalandy

ASTANA. KAZINFORM — QR Syrtqy ister mınıstrliginiń resmı ókili Germanııada qaza bolǵan eks-sýdıa Aıgúl Saılybaevanyń ólimine qatysty sońǵy derekterdi aıtty, dep habarlaıdy Kazinform agenttigi.

Aıbek Smadııarovtyń aıtýynsha, Germanııanyń quqyq qorǵaý organdary kisi óltirý faktisi boıynsha qylmystyq is qozǵaǵan.

— Germanııa Federatıvtik Respýblıkasynyń quqyq qorǵaý organdary kisi óltirý deregi boıynsha qylmystyq is qozǵady. Tergeý júrgizilip jatyr. Germanııa Syrtqy ister mınıstrliginiń málimetinshe, Darmshtadt qalasynyń sot sheshimimen marqumnyń enesi — Natalıa Dontsova kúdikti retinde tanyldy. Germanııa polıtsııasy ony qamaýǵa alý týraly order berdi. Qazirgi ýaqytta onyń qaıda ekeni belgisiz, sondyqtan ol halyqaralyq izdeý jarııalandy, — dedi ol BAQ ókilderine arnalǵan brıfıngte.

Resmı ókildiń aıtýynsha, Germanııadaǵy Qazaqstan elshiliginiń kómegimen qylmystyq istiń materıaldary marqumnyń týystary men advokatyna tabystalǵan.

— Tergeý múddesinde saı jáne taratýǵa bolmaıtyn málimetterdiń tarap ketýine jol bermeý maqsatynda nemis tarapy bul iske qatysty egjeı-tegjeıli málimetterdi jarııa etpeı otyr, — dep tolyqtyrdy Aıbek Smadııarov.

Eske salaıyq, ótken jyldyń maýsym aıynda Germanııada eks-sýdıa Aıgúl Saılybaevanyń zorlyq-zombylyq belgisi bar máıiti tabylǵan bolatyn. 

40 jastaǵy Aıgúl Saılybaeva Sheffıldte (Anglııa) bilim alyp, keıin Astanada sýdıa bolyp jumys istegen. Sońǵy jyldary ol kúıeýi, qyzy jáne enesimen birge Germanııanyń Benshaım qalasynda turǵan.

Onyń denesi qala shetinen tabyldy. BAQ derekterine sáıkes, marqumnyń qolynda, moınynda jáne betinde pyshaq jaraqattary bolǵan. 

Sonymen qatar, Aıgúl Saılybaevamen birge onyń 49 jastaǵy enesi Natalıa Dontsova da joǵalyp ketkeni belgili boldy. Ol 4 maýsym kúni nemeresin balabaqshadan alyp, úıine ákelgen. Sol ýaqyttan beri Natalıa Dontsovadan esh habar joq.