Eks-sýdıa Aıgúl Saılybaevanyń qazasy: Qazaqstanda jańa epızodtar negizinde tergeý bastaldy
ASTANA. KAZINFORM – Germanııada qaıtys bolǵan burynǵy sýdıa Aıgúl Saılybaeva isine qatysty Qazaqstanda jańa qylmystyq ister tirkeldi. Bul týraly advokat Janna Orazbaqova Instagram paraqshasynda habarlady.
Eske sala ketsek, 2025 jyldyń maýsym aıynda Germanııa aýmaǵynda eks-sýdıa Aıgúl Saılybaevanyń zorlyq-zombylyq belgileri bar denesi tabylǵan bolatyn.
Advokattyń aıtýynsha, qaıǵyly oqıǵadan beri bir jarym jyl ótse de, Germanııadaǵy quqyq qorǵaý organdary tarapynan isti tergeýde aıtarlyqtaı ilgerileý joq.
— Qazaqstan aýmaǵynda Aıgúlge jasalǵan azaptaýlar faktisi boıynsha qylmystyq is tirkeı aldyq. Onyń qurbylary Dontsovtyń qolynan alǵan dene jaraqattarynyń fotosýretterin usynyp, kýálik berdi, — dedi advokat.
Onyń málimdeýinshe, nemis polıtsııasy áreketsiz otyr jáne kúdiktilerdi izdestirý men ustaý boıynsha shara qoldanbaǵan.
— Al Dontsov Aleksandr bolsa, bostandyqta emin-erkin júr, tipti BAQ-qa suhbat beredi. Qaza tapqan Aıgúl – Qazaqstan azamaty. Onyń qartaıǵan ata-anasy júkti qyzynan aıyryldy, nemeresimen baılanys ornata almaı otyr, — dep jazdy Orazbaqova.
Advokat sot-medıtsınalyq saraptama qorytyndysyn da jarııalady. Sarapshylardyń málimetinshe, qylmys keminde eki túrli zattyń — ótkir jáne doǵal quraldyń kómegimen jasalǵan. Bastyń artqy tusyna tıgen soqqy Aıgúldiń esinen tanýyna sebep bolýy múmkin. Betinde, moınynda jáne denesinde kóptegen jaraqattar, sonymen qatar alaqandary men saýsaqtarynyń arasynda tereń tilikter anyqtalǵan.
Ólimniń sebebi — kóp mólsherde qan joǵaltý.
— Aıgúldiń ata-anasy bizdiń Syrtqy ister mınıstrligi nemis áriptesterine dıplomatııalyq nota jiberip, qylmyskerlerdi izdeý isin jandandyrady dep úmittenedi. Sondaı-aq Qazaqstanda tirkelgen «azaptaý faktisi» boıynsha qylmystyq is aıasynda tolyqqandy jáne ádil tergeý júrgizilip, tıisti úkim shyǵarylady dep senedi, — dedi Orazbaqova.
2025 jylǵy 29 tamyzda Germanııa prokýratýrasy Kazinform tilshisiniń saýalyna jaýap berip, tergeýdiń aıaqtalýy ázirge kútilmeıtinin jáne eshkimniń ustalǵany týraly aqparat joq ekenin málimdedi.
Aıta ketsek, Aıgúl Saılybaeva — Astananyń Saryarqa aýdandyq sotynyń burynǵy sýdıasy, «Bolashaq» baǵdarlamasynyń túlegi. Ol 2024 jylǵy 4 maýsymda Germanııanyń Benshaım qalasynda iz-túzsiz joǵalyp ketken. Sol kúni ol qyzyn balabaqshaǵa aparyp, sodan keıin baılanys úzilgen.
Tústen keıin shamamen 14:30-da balany ájesi – Natalıa Dontsova alyp ketken, keıin onyń ózi de joǵalǵan.
Birneshe aptadan soń Aıgúldiń zorlyq belgileri bar denesi qalanyń shetinde, plastıkalyq qaptyń ishinen tabylǵan.
Aıgúl Saılybaevamen birge onyń 49 jastaǵy enesi Natalıa Dontsova da joǵalyp ketken. 4 maýsym kúni ol nemeresin balabaqshadan alyp kelgen soń, sodan beri ony eshkim kórmegen.