Eks-sheneýnikterdiń Djeffrı Epshteınmen baılanysyn tekserý kerek — Ashat Rahymjanov
ASTANA. KAZINFORM — Elimizdiń burynǵy joǵary laýazymdy eks-sheneýnikteriniń Djeffı Epshteınmen baılanystaryn tekserý qajet. Bul týraly Májilistiń jalpy otyrysynda Bas prokýrordyń atyna saýal joldaǵan JSDP fraktsııa jetekshisi, depýtat Ashat Rahymjanov aıtty.
Onyń aıtýynsha, jarııa etilgen «Epshteın faıldarynda» memlekettik negizgi laýazymda bolǵan «eski Qazaqstannyń» saıası elıta ókilderiniń derekteri kezdesedi.
— Máselen, qazirgi ýaqytta memlekettik satqyndyq jáne bılikti basyp alýǵa áreket jasaǵany úshin jazasyn ótep jatqan burynǵy Premer-mınıstr jáne UQK tóraǵasy Kárim Másimov jazbalarda keminde 8 ret atalady. Jazbalardan Epshteın men Másimovtiń jeke tanys bolǵany baıqalady. Kóptegen suraq týyndaıdy. Nelikten joǵary laýazymdy qazaqstandyq sheneýnik Epshteınmen kezdesýge bastamashylyq jasap, onymen jolyqqan? Bul kezdesýler qaı jerde ótti? Sol ataqty aralda emes pe? — dedi Ashat Rahymjanov.
Depýtattyń atap ótýinshe, Epshteın men Ulttyq banktiń burynǵy tóraǵasy Qaırat Kelimbetovtiń Nıý-Iorkte birge demalǵany týraly derek te sheteldik BAQ-tyń nazaryn aýdarǵan.
— Hat almasýda Másimov pen Kelimbetovtiń Djeffrı Epshteınmen baılanystary men kezdesýleri talqylanady, jeke sálem joldanady, túrli birlesken is-sharalar sóz bolady. Sondaı-aq aty atalmaǵan basqa tulǵalar, mysaly, memlekettik qaýipsizdikke jaýapty bolǵan belgili bir joǵary laýazymdy general týraly da aıtylady. Ol adam kim? Múmkin, taǵy da sol Másimov shyǵar? Munan bólek, jarııalanǵan qujattardan Epshteınniń Qazaqstanǵa birneshe ret kelgeni belgili bolyp otyr. Sonymen qatar, faıldarda onyń elimizdegi barlyq baılanysy tolyq kórsetilmeýi de yqtımal, — dedi depýtat.
Ol sondaı-aq halyqaralyq jarııalanymdarda AQSh-ta qaıǵyly jaǵdaıda qaza tapqan model Rýslana Korshýnova týraly da aıtylatynyn atap ótti.
— Qazaqstannyń joǵary laýazymdy sheneýnikteriniń mundaı tulǵamen kez kelgen baılanysy birqatar suraq týyndatady. Djeffrı Epshteın Qazaqstanǵa qandaı maqsatpen jıi kelgen? Sol kezeńdegi qandaı joǵary laýazymdy tulǵalarmen baılanysta bolǵan? Qupııa aqparattyń syrtqa ketýine jol berildi me? Memlekettik sheshimder qabyldaǵan tulǵalarǵa syrtqy yqpal etý arnalary jasalmady ma? Olarǵa qatysty áshkereleıtin materıaldar jınalmady ma? Qazaqstandyq sheneýnikterdiń Epshteınmen baılanystary sol kezdegi el basshylyǵy tarapynan ruqsat etildi me? Qazaqstan azamattary el taǵdyry kimderdiń qolynda bolǵanyn jáne onyń kúmándi bedelge ıe jabyq klýbtarda saýda nysanyna aınalmaǵanyn bilýge quqyly, — dep atap ótti Ashat Rahymjanov.
Osyǵan oraı Májilis depýtaty Bas prokýratýra men Ulttyq qaýipsizdik komıteti basshylyǵyna myndaı ótinishin bildirdi:
— «Epshteın faıldarynda» atalǵan qazaqstandyq laýazymdy tulǵalar men olarmen baılanysy bar adamdar týraly aqparatty, kezdesýlerdiń sıpaty men maqsattaryn tekserý, Qazaqstan aýmaǵynda nemese shetelde basqa qazaqstandyq saıasatkerlerdiń, kásipkerlerdiń jáne shoý-bıznes ókilderiniń Djeffrı Epshteınmen baılanystary bolǵan-bolmaǵanyn anyqtaý;
— ulttyq qaýipsizdikke tónýi múmkin qaterlerge, onyń ishinde memlekettik qupııalardyń jarııa bolýyn qosa alǵanda derbes aqparattardyń jylystatylýyn, laýazymdy tulǵalardy bopsalaý táýekelderine quqyqtyq baǵa berý;
tekserý nátıjeleri men bolashaqta mundaı jaǵdaılardyń aldyn alý úshin qabyldanǵan sharalar týraly Parlament pen qoǵamǵa habarlaý.