Eks-sheneýnikter de bar: Atyraýda sottalǵandar kóshe sypyryp júr
ATYRAÝ. QazAqparat – Atyraýda sottalǵandar kóshe sypyryp júr, dep habarlaıdy QazAqparat.
Atyraý oblysy boıynsha Qylmystyq-atqarý júıesi departamenti baspasóz qyzmetiniń málimetinshe, 70-ke jýyq azamat sotpen belgilengen jazasyn óteý úshin qoǵamdyq jumysqa tartylǵan. Olar kóshelerdi sypyryp, qalanyń tazalyǵyna úles qosyp júr. Jazasyn óteýshilerdiń arasynda buryn memlekettik qyzmette bolǵan sheneýnikter de bar.
«Qoǵamdyq jumysqa tartý túrindegi jaza sot úkimimen jergilikti atqarý organdary bekitken nysandarda júzege asyrylady. Bizdiń maqsatymyz – sottalǵandardy qoǵamdyq jumysqa tartý arqyly tárbıelep, qylmystyń qaıtalanýyna jol bermeý. Óıtkeni, qoǵamdyq jumystyń tárbıelik máni tıimdiligin dáleldedi. Jazasyn óteýshi azamattar ekinshi ret shalys baspaýǵa tyrysady», - deıdi Atyraý oblysy boıynsha Qylmystyq-atqarý júıesi departamentiniń bastyǵy Manarbek Ǵabdýllın.
Departament bastyǵynyń aıtýynsha, jaýapqa tartylǵandar kúnine 4-ten 8 saǵatqa deıin jumys isteıdi. Alaıda, olarǵa eńbekaqy tólenbeıdi. Jazaǵa tartylǵandardyń kópshiligi – esirtkini paıdalanǵandar, mas kúıinde kólik júrgizgender, urlyq jasaǵandar.
Qazir probatsııa qyzmetiniń esebinde 1200 sottalýshy tur. Solardyń biri – Aman. Qylmysy úshin ókingenmen, qoǵamdyq jumysty atqarýdan qashpaıdy.
«Qylmys jasaǵanym úshin maǵan shartty jazamen qatar, qoǵamdyq jumysty atqarý mindetteldi. Kóshe tazalap júrgenime ókinbeımin. Kúnine 4 saǵat Atyraý qalasynyń kóshelerin qoqystan tazartamyn», - deıdi jazasyn óteýshi Aman.
Eske sala ketelik, budan buryn Atyraýda probatsııa esebinde turǵan adamdar jeke kásibin ashqanyn habarlaǵan edik.
