Eks-sheneýnik Shaıahmetovke qatysty sottyń kezekti otyrysy 23 shildede ótedi
ASTANA. QazAqparat - Sybaılas jemqorlyq babymen aıyptalǵan burynǵy bilim jáne ǵylym vıtse-mınıstri Saıat Shaıahmetovke qatysty kezekti sot otyrysy 23 shildede ótetin boldy. Búgin Astana qalasy №2 Almaty aýdandyq sotynyń sýdıasy Baqytbek Syzdyqov osyndaı qaýly shyǵardy.
Toqtala ketetin jaıt, búgin sottyń alǵashqy otyrysynda eks-sheneýnik te, aıyptalýshy basqa tarap ta ózderine taǵylǵan aıypty tolyq joqqa shyǵaryp, kináli ekenderin moıyndaýdan bas tartatyndyqtaryn málimdegen.
Eske sala keteıik, 2013 jyldyń 1 qarashasynda qarjy polıtsııasy burynǵy vıtse-mınıstrge qatysty qylmystyq isti tergeýdi aıaqtaǵan bolatyn. Bul rette S. Shaıahmetov Óskemende 700 oryndyq bilim berý mekemesi qurylysy kezinde qyzmet ókilettigin teris paıdalandy dep aıyptalyp otyr. Ol memleketke 1,15 mlrd. teńge kóleminde shyǵyn keltirdi delinedi. Budan bólek, sotta aıyptalýshy retinde «Qazaqstan Respýblıkasynda salynyp jatqan bilim jáne ǵylym nysandary dırektsııasy» JShS bas dırektory Aleksandr Pak, «Servıs JAK» JShS burynǵy bas dırektory Roman Kıreev pen, atalǵan JShS qazirgi dırektory Alekseı Týtýbalın bar. Olarǵa bıýdjet qarjysyn alaıaqtyq jolmen jymqyrdy degen aıyp taǵylǵan.
