Eks-premer Serik Ahmetov sotqa apellıatsııalyq shaǵym túsirdi
QARAǴANDY. QazAqparat - Túrmede jazasyn ótep jatqan burynǵy premer-mınıstr Serik Ahmetov ózinen materıaldyq shyǵyn retinde 17 mln. teńgeni óndirip alý týraly birinshi satydaǵy sottyń sheshimin joıý boıynsha Qaraǵandy oblystyq sotyna apellıatsııalyq shaǵym túsirdi, dep habarlaıdy QazAqparat tilshisi.
Sottyń uıǵarymy boıynsha Serik Ahmetov pen onyń qaramaǵynda jumys istegen burynǵy tórt sheneýniktiń memleketke keltirgen materıaldyq shyǵyn kólemi 17 mln. 310 myń teńgeni quraıdy.
«Jaýap berýshilerdiń barlyǵynan apellıatsııalyq shaǵymdar sot keńsesine kelip tústi, olar óndiriske alyndy. Tyńdaýlar ýaqyty áli belgilengen joq», - dep málim etti Qaraǵandy oblystyq sotynan.
Eske salaıyq, Qaraǵandy qalasynyń Qazybek bı aýdandyq soty Qaraǵandy qalasynyń ákimi Nurlan Áýbákirovtyń talabyn ishinara qanaǵattandyryp, eks-premer-mınıstr Serik Ahmetovten, Qaraǵandy oblysynyń burynǵy ákimi Baýyrjan Ábdishevten, Qaraǵandy qalasynyń burynǵy ákimi Meıram Smaǵulovtan, Qaraǵandy qalasy ákiminiń burynǵy orynbasary Muhtar Adambekovten jáne turǵyn úı-kommýnaldyq sharýashylyǵy bóliminiń burynǵy basshysy Aıdos Jákenovten 17 mıllıonnan astam teńgeni óndirip alýdy úkim etti . Atalǵan soma bes jaýapkerden ortaq negizde óndirip alýǵa jatady.
Nurlan Áýbákirov óz talabynda bes jaýapkerden 201 mıllıon 900 myń teńgeni memleketke qaıtarýdy talap etken bolatyn. Onyń málimdeýinshe, Serik Ahmetov Qaraǵandy oblysynyń ákimi bolǵan ýaqytta jeke kásipkerler men kommertsııalyq uıymdardyń quqyqtaryn shekteý maqsatynda quryltaıshylardyń biri óziniń uly Danııar Ahmetov pen onyń orynbasary - týǵan aǵasy Berik Ahmetov bolyp tabylatyn «Stal Tsınk» JShS-ǵa artyqshylyqtar berip kelgen.
Olar birneshe jyldar boıy Qaraǵandy qalasynyń kóshelerin jaryqtandyratyn baǵandardy aýystyrý boıynsha tenderler utyp, memlekettik tapsyrystyń negizgi mólsherin joǵary baǵamen ózderine alyp otyrǵan. Serik Ahmetovke qylmysty jasaýǵa qolastyndaǵy tórt qyzmetkeri kómektesip kelgen.
