Eks-mınıstr: JOO alystan kelgen stýdentti jataqhanamen qamtýy kerek degen norma bar
Qaýipsizdik talaptary saqtalmaǵan hostel men jataqhanalarda adamdar jatpaýy tıis. Bul týraly Májilis depýtaty Ashat Aımaǵambetov málim etti, dep habarlaıdy Kazinform.
«Hostelder, jataqhanalar nemese turǵyn úıler qaýipsizdik talaptarymyzǵa sáıkes bolýy kerek. Eger bul talaptar oryndalmasa, hostel men jataqhanalarda adamdar jatpaýy tıis. Basty másele – osynda. Sondyqtan osy hosteldi kim qabyldap aldy? ıAǵnı nysandaǵy qaýipsizdik erejeleri qanshalyqty qamtamasyz etilgeni tekseris barysynda zertteledi», – dedi A. Aımaǵambetov Májiliste tilshiler suraǵyna jaýap bere otyryp.
Depýtattyń paıymynsha, qazir elimizdegi stýdentterdi jataqhanamen qamtamasyz etý mańyzdy.
«Keıingi birneshe jylda stýdentterdi jataqhanamen qamtamasyz etý baǵytynda 30 myńnan astam jańa oryn paıdalanýǵa berildi jáne bul jumysty jalǵastyrý qajet. Kezinde biz barlyq ýnıversıtet alystan kelgen stýdentterdi jataqhanamen qamtamasyz etýi kerek degen normany bekittik. Eger olar osy normany oryndamasa, mınıstrlik basqa tıisti jazalaý sharalaryn, lıtsenzııalardy qaıtaryp alý sııaqty qadamdar jasaı alady. Atap aıtqanda, bul jataqhanalardyń barlyǵy qaýipsizdik talaptaryna saı bolýy kerek», – dedi Ashat Aımaǵambetov.
Eske salaıyq, búgin Almatyda hostel órtenip, 13 adam qaza tapty. Qalalyq tótenshe jaǵdaılar departamentiniń málimetinshe, órt týraly habarlama 30 qarasha kúni saǵat 05:33-te túsken. Birinshi órt sóndirý bólimi shaqyrtý ornyna 7 mınýt ishinde jetti.
«Kelgen boıda 1-qabaty jáne jertólesi jataqhanaǵa aınalǵan 3 qabatty turǵyn úıdiń janyp jatqany anyqtaldy. Aldyn ala aqparat boıynsha órttiń jalpy aýdany — 30 sharshy metr. Qabyldanǵan sharalarmen órt 06:22-de joıyldy», — dep habarlady departamentten.
Órtten zardap shekken 2 adam qalalyq jedel shuǵyl kómek kórsetý aýrýhanasyna jetkizildi. Qalalyq densaýlyq saqtaý basqarmasynyń málimetine sáıkes, naýqastyń birine kómirqyshqyl gazynan ýlaný dıagnozy qoıyldy.
Hostelden 59 adam evakýatsııalanyp, 56-sy jaqyn mańdaǵy mektepke ýaqytsha ornalastyryldy.
Almatyda hostelde bolǵan órt týraly sońǵy málimetter myna jerde.
