Eks-mınıstr J.Dosqalıevtiń aýyr jáne asa aýyr qylmystar jasaǵanyna baılanysty, onyń qamaýǵa alynýy zańdy dep tanyldy - Astana qalasynyń soty
ASTANA. Qazannyń 22-si. QazAqparat - Astana qalasy Saryarqa aýdany №2 aýdandyq sotynyń 2010 jylǵy qazannyń 12-sindegi qaýlysymen aıyptalýshy eks-densaýlyq saqtaý mınıstri Jaqsylyq Dosqalıevti qamaýǵa alýǵa sanktsııa berilgen bolatyn.
Birinshi satydaǵy sottyń sheshimine kelispegen J.Dosqalıev pen onyń qorǵaýshylary Astana qalalyq sotyna shaǵymdanyp, qamaýǵa alý sharasy merziminen buryn qabyldanǵany, onyń aýrýynyń dıagnozyn anyqtaý úshin negizderdiń jetkilikti bolmaǵany jáne J.Dosqalıevtyń jeke tulǵalyq jaǵdaıy eskerilmegeni týraly ýájder aıtqan bolatyn.
Іstiń materıaldaryn jáne barlyq mán-jaıdy zerdelep shyqqan Astana qalalyq sotynyń qazannyń 21-indegi appelıatsııalyq sot alqasy aýdandyq sottyń qaýlysyn ózgertýsiz qaldyryp, advokattardyń aryzdaryn qanaǵattandyrǵan joq. Bul sheshimge J.Dosqalıevtiń aýyr jáne asa aýyr qylmystar jasady dep aıyptalýy negiz bolyp otyr. Atap aıtqanda, aıyptaý týraly qaýlyǵa sáıkes eks-mınıstr QR Qylmystyq kodeksiniń 308-shi baby 4-shi tarmaǵy «v» tarmaqshasynda qarastyrylǵan aýyr qylmysty jáne QR qylmystyq kodeksiniń 311-shi baby 5-shi tarmaǵynda qarastyrylǵan asa aýyr qylmysty jasaǵany úshin aıyptalyp otyr. Mundaı qylmystar úshin 10 jyldan 15 jylǵa deıin bas bostandyǵynan aıyrý, dúnıe-múlkin tárkileý jazasy qarastyrylýyna baılanysty bul jaǵdaıda onyń qamaýǵa alynýy zańdy, delingen Astana qalalyq sotynyń baspasóz qyzmeti jasaǵan málimdemede.
Sottyń J.Dosqalıevtiń jeke tulǵalyq jaǵdaıyn, buǵan deıingi sińirgen eńbegin, memlekettik joǵary qyzmet atqarǵanyn nazarǵa almaǵany týraly advokattardyń ýájderi negizsiz, sebebi joǵaryda atalǵan qylmystar aýyr jáne asa aýyr qylmystarmen qosa, sybaılas jemqorlyq qylmystyń qataryna da jatady, al bul jaıt onyń áreketteriniń qoǵam men memleket úshin asa qaýiptiligin bildiredi.
Oǵan qosa, sottyń eks-mınıstrdiń densaýlyq jaǵdaıyn eskermegeni jáne onyń tergeý amaldaryna qatysa almaıtyndyǵy týraly ýájderi de shyndyqqa saı kelmeıdi dep tanyldy, sebebi Reseı men Qazaqstannyń joǵary bilikti mamandarynyń qorytyndysyna sáıkes jáne «QR Ulttyq ǵylymı medıtsınalyq ortalyǵy» aktsıonerlik qoǵamynyń dárigerler konsılıýmynyń qazannyń 12-sindegi túıindemesi negizinde J.Dosqalıevtiń jaǵdaıy ortasha aýyr dep baǵalanǵan, ol qımyldaı alady, saýaldarǵa durys jaýap berip, nusqaýlardy oryndaı alady. Sondyqtan da, patsıent tergeý abaqtysynda emhana jaǵdaıynda em qabyldap, ońala alady, degen qorytyndy shyǵaryldy.
