Syrym Sháriphanov mınıstr laýazymyn nebary 8 aı atqardy

ASTANA. KAZINFORM – Syrym Sháriphanov Tótenshe jaǵdaılar mınıstri laýazymynan bosatyldy. Kazinform osy qyzmette 7 aı jumys istegen eks-mınıstr nesimen este qalǵanyna sholý jasady.

Syrym Sháriphanov bul salanyń tizginin Abaı oblysyndaǵy alapat órtten keıin kelgen ıÝrıı Ilınnen qabyldap alǵan edi. 

Tótenshe jaǵdaılar mınıstrligine qarasty Málik Ǵabdýllın atyndaǵy Azamattyq qorǵaý akademııasynyń bastyǵy bolyp júrgen jerinen mınıstr laýazymyna taǵaıyndalǵan Syrym Sháriphanov jarty jyldan astam ýaqyttyń ishinde mınıstr retinde eshqandaı belsendi áreketimen, sheshimtal qımylymen este qalmady. Soǵan qaramastan, únemi BAQ pen áleýmettik jeli qoldanýshylarynyń nazarynda boldy. Óıtkeni jyldar boıy salada qordalanǵan problemalardyń sheshimin jurttyń jańa mınıstrden talap etýi zańdylyq edi.

Qaraǵandy oblysynyń shahtalaryndaǵy apattar, Almaty hostelindegi órt kezinde, jýyqta bolǵan jer silkinisinde tótenshe jaǵdaılar qyzmeti utymdy áreket etti deýge kelmeıdi. 
Byltyr 1 tamyz kúni Almatyda 16 qabatty úıdiń órtengeni el esinde. Amaly qalmaǵan turǵyndar balalaryn terezeden laqtyryp, artynan ózderi de sekirýge májbúr bolǵan. 

Sol kezde jelidegi jurt tarapynan «Nege bıiktegi adamdarǵa avtobaspaldaq der kezinde jetpedi?» - degen suraq kóp qoıylǵan.

«Avtobaspaldaq bar, biz 16-qabattan adamdardy evakýatsııalaýǵa múmkindik beretin úsh avtobaspaldaq qoıǵan edik. Qurylysshylardyń kómegine kelsek, olar jaqyn jerde – turǵyn úı kesheninen 300 metr qashyqtyqta bolǵan jáne tezirek kómekke kelgen. Bizdiń bólimsheler 8 mınýtta kelip, talaptarǵa sáıkes jumys istedi.

Olar sekirgen soń, birer mınýttan keıin bizdiń qyzmetkerler osy páterlerge kirip, adamdardy evakýatsııalady. Atap aıtqanda, sekirgen áıelderdiń egde jastaǵy týysy qutqaryldy. Ózderińiz kórip otyrǵandaı, balkonǵa shyǵyp, tútin kirmeýi úshin esikti jaýyp, kútýge bolar edi. Kóptegen adamdar sııaqty qutqarýshylardyń kómegin kútý kerek edi», - dep jaýap bergen mınıstr. 

Abaı oblysynda birneshe adamnyń ólimine túrtki bolǵan alapat orman órti kezinde tilsiz jaý týraly der kezinde habarlandyrý júıesiniń bolmaǵany qatty synǵa ushyraǵan. Dál sondaı qatelik Syrym Sháriphanovtyń kezinde bolǵan Almatydaǵy jer silkinisinde de qaıtalandy. 
Memleket basshysy Qasym-Jomart Toqaev izinshe Almatyǵa saparlap, mınıstrge eskertý jasaǵan bolatyn.

«Qazirgi jumysty kóńilden shyǵady dep aıtýǵa kelmeıdi. Mınıstr Sháriphanovqa eskertemin. Eger siz óz jumysyńyzdy aýyr sanaıtyn bolsańyz, ashyǵyn aıtyńyz, ǵylymı-oqytýshylyq qyzmetińizge qaıtaramyz. Onda turǵan eshteńe joq. Qazirgi ahýal óte kúrdeli jáne jaýapty, elimizdiń qaýipsizdigine tikeleı baılanysty. Sondyqtan bárimiz jınaqy, uqypty jáne belsendi bolýymyz qajet. Basqa jol joq. Prezıdent Ákimshiligi búgin aıtylǵan barlyq máseleni baqylaýda ustaıdy», - degen bolatyn Memleket basshysy.

Qyrkúıek aıynyń basynda Syrym Sháriphanov WhatsApp messendjerinde vedomstvonyń jeke quramyna arnalǵan telefon nómiri iske qosqany habarlandy.

Bul nómir Tótenshe jaǵdaılar mınıstrliginiń aýmaqtyq bólimsheleriniń, vedomstvolyq baǵynysty uıymdarynyń qyzmetkerleri, azamattyq qorǵaý organdarynyń ardagerleri óz suraqtaryn mınıstr atyna tikeleı joldaý úshin ashylǵany aıtyldy. 

Búgin onyń ornyna Shyńǵys Árinov mınıstr bolyp keldi.