Eks-mınıstr Murat Bektanovtyń isi apellıatsııalyq alqaǵa joldandy
«M.Bektanov mamandandyrylǵan áskerı aýdanaralyq sottyń úkimimen 2023 jyldyń 24 aqpanyndaǵy QR Qylmystyq kodeksiniń 451-babynyń 3-bóligi boıynsha 12 jylǵa bas bostandyǵynan aıyryldy», - delingen jaýapta.
Úkim boıynsha ol merzimdi jazasyn qylmystyq atqarý júıesiniń qaýipsizdigi barynsha kúsheıtilgen mekemesinde óteýi kerek bolǵan.
«Úkim áli zańdyq kúshine engen joq, sottalýshy M.Bektanov pen qorǵaýshysy A.N.Podýshkın úkimge shaǵym túsirdi.
Іs áskerı sottyń qylmystyq ister jónindegi apellıatsııalyq alqasyna shaǵym máni boıynsha qaraýǵa joldandy», - dep jazady E.Sháripbekov.
Aıta keteıik, 9 naýryz kúni burynǵy Qorǵanys mınıstri Murat Bektanov 12 jylǵa sottalǵan bolatyn.
«M. Bektanov Qazaqstan Respýblıkasy Qylmystyq kodeksiniń 451-babynyń 3-bóligi boıynsha qylmystyq ister jónindegi mamandandyrylǵan aýdanaralyq áskerı sotynyń 24.02.2023 jylǵy úkimimen sottaldy. Oǵan eń joǵary qaýipsizdik qylmystyq-atqarý júıesi mekemesinde jazasyn óteı otyryp, 12 jyl merzimge bas bostandyǵynan aıyrý túrindegi jaza taǵaıyndaldy», - dep habarlanǵan.
Atalǵan qylmystyq istiń «qupııa» túrde qaralǵanyn alǵa tartqan sot tolyq aqparat bermegen bolatyn.
