Eks-mınıstr Birtanov pen onyń orynbasary sotta qorytyndy sóz sóıledi
Atalǵan protsess «Zoom» platformasynda onlaın rejımde ótti. Onda alǵash bolyp sóz alǵan eks-densaýlyq saqtaý vıtse-mınıstri Oljas Ábishev ózine taǵylǵan aıyptardyń dáıeksiz ekenin alǵa tartyp, tolyq aqtaýdy surady.
«Qurmetti sot jáne atalǵan protseske qatysýshylar! Men buryn aıtqanymdaı, ózimdi kinálimin dep eseptemeımin. Meni ata-anam árqashan zańǵa baǵynýǵa úıretti. Bul meniń otabysymnyń negizgi tárbıe ózegi boldy.
Tergeý barysynda barlyq suraqtarǵa naqty ári anyq jaýap bere bildim. Maǵan taǵylǵan aıyptar oıdan shyǵarylǵan, dálelsiz jáne olar Qarjylyq monıtorıng agenttiginiń qııalynan týǵan. Bizdiń prokýrorlar da shyndyqqa kelgende soqyr, sańyraý. Aıyptaýshy jaqtyń ІT tehnologııalardan habary joq. Prokýratýra is qozǵalyp otyrǵan elektrondy platformanyń qalaı jumys isteıtinin de bilmeıdi.
Men ózimniń kináli emes ekenimdi dáleldeý úshin sońyna deıin baramyn jáne meni tolyq aqtaýdy suraımyn», - dedi Oljas Ábishev.
Kelesi bolyp qorytyndy sóz sóılegen Densaýlyq saqtaý mınıstrliginiń eks-basshysy Eljan Birtanov buǵan deıingi sot otyrystarynda óziniń kinásizdigin aıǵaqtaıtyn naqty dálelder usynǵanyn atap ótti.
«Sot tergeýi kúrdeli ári kúızelis jaǵdaıynda ótkenimen, biz bul istiń aqtyq kezeńine jetip otyrmyz. Osy kezge deıin barlyq dálelderdi usyndyq, kýágerlerdi tyńdadyq, aıyptaý aktisin de estidik. Onyń nátıjesinde memlekettik aıyptaýshy organ maǵan jáne Oljas Ábishevke taǵylǵan kináni dáleldeı almaǵanyn kórdik. Bizdiń jalǵyz qylmysymyz – jaqsy memlekettik qyzmetker bolýǵa talpynǵan nıetimiz dep bilemin.
Elektrondy platformanyń bar ekeni, aqshanyń qaıda jumsalǵany anyq. Jaǵdaıdyń qalaı órbigeni de barshaǵa aıqyn. Sanıtarlyq avıatsııa boıynsha da solaı. Men oıymsha, jetkilikti dálelder keltirdim jáne bul iste men eshqandaı jeke bastyń paıdasyn kózdemedim.
Qurmetti sot, keńesý bólmesinde siz bizdiń tarap usynǵan barlyq dálelderdi saralap, memlekettik aıyptaýshy tarap taqqan zańsyz dáıekterdi obektıvti túrde baǵalap, meni jáne Oljas Ábishevti kinásiz dep tanısyz dep úmittenemin. Biz qylmysker emespiz, zańdy buzǵan joqpyz», - dep sózin túıindedi Eljan Birtanov.
Sýdıanyń aıtýynsha, sot úkimi shyǵatyn ýaqyt aldyn ala belgilenip, oǵan aıyptalýshylar men aıyptaýshy organ tarapynan 8 adam shyqyrylady. Ol protsess oflaın rejımde ótetin bolady.
Eske salaıyq, burynǵy Densaýlyq saqtaý mınıstri Eljan Birtanov 2020 jyldyń 3 qarashasynda bıýdjet qarajatyn ysyrap etti degen kúdikpen qamaýǵa alynǵan bolatyn.
Tergeý materıaly boıynsha, Eljan Birtanov pen onyń orynbasary Oljas Ábishevke «Ericsson Nicola Tesla» kompanııasynyń qyzmetin qoldaný kezinde «laýazymdyq ókiletin teris paıdalaný» arqyly memleketke 1,5 mlrd teńge shyǵyn keltirdi degen aıyp taǵylǵan.