Eks-fýtbolshy Romarıo Rıo-de-Janeıro gýbernatorlyǵyna úmitker bolmaq
ASTANA. QazAqparat - Tanymal brazılııalyq fýtbolshy, 1994 jylǵy álem chempıony Romarıo Podemos («Podemos» nemese «Qolymyzdan keledi», burynǵy Ulttyq trabalıstik partııa) partııasynyń atynan Rıo-de-Janeıro shtatynyń gýbernatorlyǵyna úmitker bolmaq. Qazir Brazılııa parlamentiniń joǵarǵy palatasynyń senatory, áıgili sportshy seısenbi kúni jergilikti SporTV telearnasyna bergen suhbatynda osylaı málimdegen, dep habarlaıdy TASS.
«Aldaǵy ýaqytta Rıo-de-Janeıro gýbernatory saılaýy ótedi. Meniń oǵan úmitker bolýym ábden múmkin. Biz qazir partııalastarymyzben kezdesýler ótkizip jatyrmyz. Qazirdiń ózinde partııanyń meni usynatynyna qol jetkize alamyn deýge bolady», - dedi ol.
2016 jyldyń maýsymynda Romarıo Rıo-de-Janeıro qalasynyń meri bolýǵa úmitker bolyp, keıinnen kandıdatýrasyn qaıtaryp alǵan bolatyn. Brazılııalyq BAQ-tyń aıtýynsha, eks-sportshynyń sheshimi saýalnamalardyń nátıjelerimen baılanysty.
Zertteýler Romarıony qoldaǵan qala turǵyndary jetkilikti bolmaǵanyn kórsetken. Ol 2015 jyldyń qańtarynan bastap Brazılııa parlamentiniń joǵarǵy palatasynda Rıo-de-Janeıro shtatynan saılanǵan senator bolyp otyr. Ústimizdegi jyldyń maýsymyna deıin senatta Brazılııa sotsıalıstik partııasynyń múddesin qorǵaǵan ol keıinnen Ulttyq trabalıstik partııanyń fraktsııasyna ótken.
