Eks-eýrodepýtattyń uly halyqaralyq esirtki jelisin uıymdastyrdy degen kúdikke ilindi
ASTANA. KAZINFORM – Dúısenbi kúni Belgııada Ispanııa men Belgııa arasynda kannabıs satatyn iri jelini uıymdastyrdy degen kúdikke ilingen alty adam ustaldy.
Olardyń arasynda Eýroparlamenttiń adam quqyqtary jónindegi komıtetiniń burynǵy basshysy Marı Arenanyń uly da bar.
Brıýssel prokýratýrasy sársenbide tergeý sýdıasy Ispanııa men Belgııa arasyndaǵy iri kólemdegi kannabıs kontrabandasyna qatysty tergeý aıasynda qylmystyq uıymǵa qatysy bar jáne esirtki ákeldi, saqtady jáne satty degen aıyp taǵyp, alty kúdiktini qamaýda ustaý týraly sheshim shyǵarǵanyn jarııalady.
Osy tergeý aıasynda barlyǵy on beske jýyq kúdikti qamaýǵa alynǵan.
Dúısenbide Brıýsseldiń Federaldyq sot polıtsııasy el astanasynyń sot okrýgindegi birneshe mekenjaıda, sondaı-aq Vallondyq Brabant, Lej jáne Namıýr aýdandarynda tintý júrgizdi.
- Qamaýǵa alynǵan alty kúdiktiniń biri qylmystyq uıymnyń basshysy bolyp sanalady, - dep málimdedi Brıýssel prokýratýrasy.
Tutqyndalǵan alty adamnan basqa, qalǵandary bosatyldy.
RTBF telearnasynyń habarlaýynsha, qamaýǵa alynǵan kúdiktilerdiń arasynda Eýroparlamenttiń sotsıalıstik partııadan depýtaty Marı Arenanyń uly Ýgo Lemer bar.
Sońǵysy kannabıs satýǵa mamandandyrylǵan BRC&Co kompanııasynyń negizin qalaǵan.
Belgııalyq telearnadaǵy derekkózdiń habarlaýynsha, Ýgo Lemer – qamaýǵa alynǵan alty kúdiktiniń biri.
Tergeý amaldary 2023 jyldyń shildesinde Sybaılas jemqorlyqqa qarsy kúres jónindegi ortalyq basqarma (OCRC) júrgizgen basqa tergeý kezinde anyqtalǵan esirtkiniń zańsyz aınalymyna qatysty aıǵaqtar negizinde bastaldy.
Óz kezeginde Eýroparlamentte adam quqyqtary jónindegi shaǵyn komıtettiń tóraıymy qyzmetin atqarǵan Marı Arena Eýroparlamenttegi bir top adam Taıaý Shyǵystaǵy keıbir elderge aqsha men baǵaly syılyqtar úshin saıası qyzmet kórsetken taǵy bir atyshýly iske qatysy bar.
Osy is aıasynda Belgııa polıtsııasy Eýropa astanasyn dúr silkindirgen birneshe tintý men tutqyndaý júrgizdi. Tintý kezinde kompıýterler, uıaly telefondar men 600 myń eýro tárkilendi.