Eks-dıplomat Sáken Mamashqa qatysty sot otyrysy ishinara jabyq ótedi

ASTANA. KAZINFORM – Elordada burynǵy dıplomat Sáken Mamashqa qatysty sot otyrysy ishinara ashyq jáne jabyq rejımde ótedi. Bul týraly Astana qalasy qylmystyq ister jónindegi aýdanaralyq sotynyń sýdıasy Artýr Abdyhanov málim etti.

- Sot jábirlenýshi taraptyń ótinishhatyn ishinara qanaǵattandyrý týraly qaýly shyǵardy. Negizgi sot talqylaýynyń daıyndaý bóligin ashyq formatta, al sot tergeýin jabyq otyrysta ótkizý týraly sheshim qabyldandy, - dedi Artýr Abdyhanov.

Sondaı-aq aıyptalýshy Sáken Mamash ózin foto, vıdeoǵa túsirýge qarsy boldy, sýdıa onyń talabyn qanaǵattandyrdy. Al jábir kórýshi Karına Mamash sot zalynda foto, vıdeoǵa túsirýge qarsy emes. Odan bólek, sýdıa BAQ ókilderin sot protsesine ishinara qatysýy týraly sheshim shyǵardy.

Eske salaıyq, Qazaqstannyń Birikken Arab Ámirlikterindegi elshiniń keńesshisi bolǵan Sáken Mamashqa áıelin jyldar boıy uryp keldi degen aıyp taǵylyp, is sotqa jetti.

Buǵan deıin habarlaǵanymyzdaı, Astanada eks-dıplomat Sáken Mamashqa qatysty sot otyrysy bastaldy. 

Aıta keteıik, Qazaqstannyń Birikken Arab Ámirlikterindegi elshiniń keńesshisi bolǵan Sáken Mamash bıyl 4 sáýirde qamaýǵa alyndy. 

Eske sala ketsek, byltyr mamyrda Qazaqstannyń BAÁ-degi elshiliktiń keńesshisi Sáken Mamash áıeline únemi kúsh kórsetkeni, tipti jubaıynyń ápkesine de qol kótergeni týraly habarlaǵan edik. 

Artynsha áıelin urdy dep aıyptalǵan qazaqstandyq dıplomatqa qylmystyq is qozǵaldy. 

Sondaı-aq elshi keńesshisiniń áıeli Karına Mamash daǵdarys ortalyǵyna ornalastyryldy. 

Keıin áıelin urǵan eks-dıplomatqa qatysty taǵy bir qylmystyq is qozǵaldy. 

Bıyl 21 mamyrda áıelin únemi uryp kelgen eks-dıplomat Sáken Mamashtyń isi sotqa jiberildi.