Eks-dıplomat Sáken Mamash isi: sot otyrysy keıinge qaldyryldy

ASTANA. KAZINFORM — Qazaqstannyń Birikken Arab Ámirlikterindegi elshiniń keńesshisi bolǵan Sáken Mamashqa áıelin jyldar boıy uryp keldi degen aıyp taǵylyp, is sotqa jetti. Sot otyrysynyń jalǵasy keıinge qaldy. Bul týraly prokýror Jáńgir Sádýaqas málim etti. 

— Jábir kórýshiden jaýap alyndy, ókinishke qaraı, mán-jaıdy tolyq tarqata almaımyn. Jábir kórýshiniń ótinishi boıynsha sot otyrysy keıinge qaldyryldy, 20 maýsymda ótedi, — dedi Jáńgir Sádýaqas BAQ ókilderiniń saýalyna jaýap bere turyp.

Prokýrordyń aıtýynsha, kelesi sot otyrysy da jabyq rejımde ótedi.

— Qylmystyq is 3 tomnan turady. Sotqa qatysýshy taraptar is materıaldarymen tanysty. Kelesi otyrysta jábir kórýshiden jaýap alý jalǵasady, — deıdi ol.

Buǵan deıin habarlaǵanymyzdaı sot eks-dıplomat Sáken Mamashty úıqamaqta ustaýdan bas tartty. 

Búgin Astanada eks-dıplomat Sáken Mamashqa qatysty sot otyrysy bastaldy. 

Eks-dıplomat Sáken Mamashqa qatysty sot otyrysy ishinara jabyq ótedi. 

Aıta keteıik, Qazaqstannyń Birikken Arab Ámirlikterindegi elshiniń keńesshisi bolǵan Sáken Mamash bıyl 4 sáýirde qamaýǵa alyndy. 

Eske sala ketsek, byltyr mamyrda Qazaqstannyń BAÁ-degi elshiliktiń keńesshisi Sáken Mamash áıeline únemi kúsh kórsetkeni, tipti jubaıynyń ápkesine de qol kótergeni týraly habarlaǵan edik. 

Artynsha áıelin urdy dep aıyptalǵan qazaqstandyq dıplomatqa qylmystyq is qozǵaldy. 

Sondaı-aq elshi keńesshisiniń áıeli Karına Mamash daǵdarys ortalyǵyna ornalastyryldy. 

Keıin áıelin urǵan eks-dıplomatqa qatysty taǵy bir qylmystyq is qozǵaldy. 

Bıyl 21 mamyrda áıelin únemi uryp kelgen eks-dıplomat Sáken Mamashtyń isi sotqa jiberildi.