Eks-dıplomat Sáken Mamash 6 jylǵa sottaldy
ASTANA. KAZINFORM – Búgin Astana qalasynyń qylmystyq ister jónindegi aýdanaralyq sotynyń úkimimen eks-dıplomat Sáken Mamash 6 jylǵa bas bostandyǵynan aıyryldy.
- Qylmystyq-protsestik kodekstiń 387–390, 393, 395–398, 401–402-i baptaryn basshylyqqa ala otyryp, sot Mamash Sáken Táshkenbaıulyn Qylmystyq kodekstiń 110-baby 2-bóligi 1) tarmaǵynda kózdelgen qylmys jasaǵany úshin kináli dep tanyp, oǵan 6 jyl merzimge bas bostandyǵynan aıyrý jazasyn taǵaıyndady, - degen úkim shyǵardy sýdıa Artýr Abdyhanov.
Eks-dıplomat jazasyn qaýipsizdigi ortasha mekemede óteıdi.
Eske sala ketsek, byltyr mamyrda Qazaqstannyń BAÁ-degi elshiliktiń keńesshisi Sáken Mamash áıeline únemi kúsh kórsetkeni, tipti jubaıynyń ápkesine de qol kótergeni týraly habarlaǵan edik.
Artynsha áıelin urdy dep aıyptalǵan qazaqstandyq dıplomatqa qylmystyq is qozǵaldy.
Sondaı-aq elshi keńesshisiniń áıeli Karına Mamash daǵdarys ortalyǵyna ornalastyryldy.
Keıin áıelin urǵan eks-dıplomatqa qatysty taǵy bir qylmystyq is qozǵaldy.
Bıyl 21 mamyrda áıelin únemi uryp kelgen eks-dıplomat Sáken Mamashtyń isi sotqa jiberildi.
Al 10 maýsymda Astanada eks-dıplomat Sáken Mamashqa qatysty sot otyrysy bastaldy.
Aıta keteıik, eks-dıplomat Sáken Mamashqa qatysty sot otyrysy jabyq ótti.