Eks-dıplomat isi: sot Sáken Mamashty úıqamaqta ustaýdan bas tartty
ASTANA. KAZINFORM – Qazaqstannyń Birikken Arab Ámirlikterindegi elshiniń keńesshisi bolǵan Sáken Mamashqa áıelin jyldar boıy uryp keldi degen aıyp taǵylyp, is sotqa jetti.
Sáken Mamashtyń advokaty Beıbitjan Saılaýulynyń aıtýynsha, burynǵy dıplomat jasyrynbaǵan jáne tergeý organdarynda aıyptalýshynyń Qazaqstannan ketýge áreket jasaǵany týraly senimdi dálel joq.
- Men ustaý túrindegi bultartpaý sharasyn qoǵamnan oqshaýlaýǵa baılanysty emes jeńildeý túrine ózgertýdi suraımyn, - dedi Beıbitjan Saılaýuly.
Qorǵaýshynyń málimdeýinshe, Sáken Mamash árdaıym tergeý organdarynyń shaqyrýy boıynsha kelip otyrǵan jáne tergeý sharttaryn buzbaǵan.
Alaıda sýdıa Artýr Abdyhanov aıyptalýshyny úıqamaqta ustaýǵa negiz joq dep taýyp, ótinishti qanaǵattandyrmady.
Buǵan deıin habarlaǵanymyzdaı, Astanada eks-dıplomat Sáken Mamashqa qatysty sot otyrysy bastaldy.
Eks-dıplomat Sáken Mamashqa qatysty sot otyrysy ishinara jabyq ótedi.
Aıta keteıik, Qazaqstannyń Birikken Arab Ámirlikterindegi elshiniń keńesshisi bolǵan Sáken Mamash bıyl 4 sáýirde qamaýǵa alyndy.
Eske sala ketsek, byltyr mamyrda Qazaqstannyń BAÁ-degi elshiliktiń keńesshisi Sáken Mamash áıeline únemi kúsh kórsetkeni, tipti jubaıynyń ápkesine de qol kótergeni týraly habarlaǵan edik.
Artynsha áıelin urdy dep aıyptalǵan qazaqstandyq dıplomatqa qylmystyq is qozǵaldy.
Sondaı-aq elshi keńesshisiniń áıeli Karına Mamash daǵdarys ortalyǵyna ornalastyryldy.
Keıin áıelin urǵan eks-dıplomatqa qatysty taǵy bir qylmystyq is qozǵaldy.
Bıyl 21 mamyrda áıelin únemi uryp kelgen eks-dıplomat Sáken Mamashtyń isi sotqa jiberildi.