Eks-depýtat Bekbolat Tileýhan nemen aınalysyp júr
ASTANA. QazAqparat – Qazirgi ýaqytta QR Parlamenti Májilisiniń eks-depýtaty jáne Ulttyq sport túrleri qaýymdastyǵynyń burynǵy basshysy Bekbolat Tileýhan Dúnıejúzilik etnosport konfederatsııasynyń vıtse-prezıdenti qyzmetin atqarady.
Bul týraly Ortalyq kommýnıkatsııalar qyzmetinde ótken brıfıngide Ulttyq jáne at sporty túrleri ortalyǵynyń dırektory Baqdaýlet Sábıtov aıtty, dep habarlaıdy QazAqparat tilshisi.
Ol Bekbolat Tileýhannyń Qazaqstanda ulttyq sport túrlerin damytýǵa eleýli úles qosqanyn aıta kele, qazir bul salada qyzmet etpeıtinin málim etti. Degenmen Túrkııada Dúnıejúzilik etnosport konfederatsııasy bar. Onda sol uıymda vıtse-prezıdent qyzmetin atqarady.
«Kelesi jyly biz osy konfederatsııamen birge Dúnıejúzilik kóshpendiler oıyndaryn ótkizemiz. Bul máselede onyń tarapynan qoldaý kórsetiledi dep úmittenemiz», - dep jaýap berdi Baqdaýlet Sábıtov BAQ ókilderiniń saýalyna.
Eske salaıyq, Májilis depýtaty bolǵan Bekbolat Tileýhannyń ókilettigi 2021 jyly 29 jeltoqsanda merziminen buryn toqtatyldy.
Artynsha ol ne sebepti óz erkimen mandatyn tapsyrý týraly sheshim qabyldaǵanyn túsindirdi.
Sondaı-aq, Bekbolat Tileýhan Ulttyq sport túrleri qaýymdastyǵynyń basshysy qyzmetinen de ketti.
