Eks-depýtat Bazarbek qaǵyp ketken er adam aýrýhanadan shyǵaryldy
ASTANA. KAZINFORM — Jambyl oblysynda aýyr jol apatynan keıin birneshe apta komada jatqan er adam esin jıdy. Qazir ol sóılep, jaqyndaryn tanıdy.
Naýqastyń jaǵdaıy týraly Májilistiń burynǵy depýtaty Baqytjan Bazarbek málimdedi. Ol Taraz qalalyq kópbeıindi aýrýhanasynyń aldynda túsirilgen storısti bólisti.
— Nurjigit Taraz qalalyq kópbeıindi aýrýhanasynan 31 kúnnen keıin shyǵaryldy. Ol sońǵy úsh kúnde aýrýhanadan shyǵatyn sátti taǵatsyzdana kútken, — dep jazdy Baqytjan Bazarbek.
Eks-depýtat Nurjigittiń qazirgi jaǵdaıy týraly aıtyp, onyń kelgen adamdardy tanıtynyn, sóıleıtinin jetkizdi.
Sonymen qatar ol Nurjigittiń esin jıǵan sátin de baıandady. Reanımatolog Ǵamzat Musaevqa ol ózin jaqsy sezinetinin, alaıda qoly men basy aýyratynyn aıtqan.
Dáriger naýqastyń suraqtardy túsinip, durys jaýap berip otyrǵanyna kóz jetkizgen soń, Baqytjan Bazarbekke habarlasqan.
Baqytjan Bazarbek jubaıy Adelmen birge taksıde kele jatqanda, dáriger oǵan: «Báke, súıinshi! Nurjigit oıandy!» — dep aıtqan. Bul jańalyqty estigende, ol kóz jasyna erik bergen.
Eks-depýtat jazbasynda Qulan men Tarazdaǵy medıtsına mamandaryna alǵys bildirgen. Onyń aıtýynsha, dárigerler men medbıkeler Nurjigittiń jaǵdaıyn kúni boıy baqylap, oblys ortalyǵynyń mamandary aýdandyq aýrýhanaǵa turaqty baryp turǵan.
Eske sala keteıik, 28 tamyzda Nurjigit Qulan aýdandyq aýrýhanasynan Tarazǵa jetkizilgen.
7 qyrkúıekte Baqytjan Bazarbek onyń 24 kún komada jatyp, esin jıǵanyn jáne anasy, jubaıy, balalary men basqa da jaqyndaryn tanyǵanyn habarlaǵan.
Aqzat Jıenalına
