Eks-depýtat agrosýbsıdııanyń 2,6 mlrd teńgesin jymqyrdy degen kúdikke ilindi
ASTANA. KAZINFORM — QMA Almaty oblysy boıynsha departamenti agroónerkásiptik keshendi qoldaýǵa bólingen bıýdjet qarajatyn asa iri kólemde jymqyrý faktisi boıynsha qylmystyq isti aıaqtady.
— Tergeý amaldaryna saı, qylmystyq shemany Almaty oblysy Qarasaı aýdandyq máslıhatynyń burynǵy depýtaty uıymdastyrǵan. Aýyl sharýashylyǵy salasyndaǵy tájirıbesi men memlekettik sýbsıdııalaý tetikterin jetik bile otyryp, ol bıýdjet qarajatyn zańsyz alýdyń turaqty shemasyn qurǵan.
Shemany iske asyrý úshin uıymdastyrýshy ózine baǵynysty kásiporyndar men Almaty, Jambyl jáne Túrkistan oblystarynda tirkelgen 29 sharýa qojalyǵyn paıdalanǵan, — delingen QMA habarlamasynda.
Ýákiletti organdarǵa ónerkásiptik tańqýraı alqaptaryn otyrǵyzýǵa arnalǵan elıtalyq tańqýraı kóshetterin satyp alý týraly jalǵan qujattar usynylǵan.
Málimetterdiń anyqtyǵyn rastaý maqsatynda jalǵan satyp alý-satý sharttary, qabyldaý-tapsyrý aktileri, elektrondyq shot-faktýralar jáne otyrǵyzý materıalyn óndirýshilerdi attestattaý jónindegi qujattar rásimdelgen.
Alaıda kórsetilgen kólemde kóshetter is júzinde jetkizilmegen. Al qujattarda kórsetilgen keıbir sharýashylyqtardyń ónerkásiptik kólemde tańqýraı ósirýge naqty múmkindigi bolmaǵan.
Saldarynan bıýdjetten 2,6 mlrd teńgeden astam sýbsıdııa zańsyz alynǵan.
— Zańsyz alynǵan sýbsıdııanyń 491 mln teńgesi qor naryǵynda operatsııalar júrgizýge baǵyttalǵan. Osy maqsatta kúdiktiniń jubaıynyń atyna brokerlik shot ashylyp, ol arqyly qazaqstandyq jáne sheteldik kompanııalardyń baǵaly qaǵazdary satyp alynǵan.
Budan bólek, taǵy 400 mln teńge ýaqytsha qarjylaı kómek kórsetý syltaýymen «iSolutions Capital» mıkroqarjy uıymyna aýdarylǵan. Keıin bul qarajat kúdikti tarapynan kezeń-kezeńimen qolma-qol aqshaǵa aınaldyrylǵan. Sondaı-aq kúdikti urlanǵan qarajattyń 170 mln teńgesin Qonaev qalasyndaǵy kazınoda qumar oıyndarǵa jumsaǵan. Sot sanktsııasymen kúdiktilerdiń 4 páterine, 3 avtokóligine, jeke turǵyn úıine jáne baǵaly qaǵazdaryna tyıym salyndy, — delingen habarlamada.
Úsh kúdiktige qatysty qamaýda ustaý túrindegi bultartpaý sharasy qoldanyldy.
Qylmystyq is sotqa joldandy.
Aıta ketelik qylmysqa jol ashqan áreketsizdigi úshin 2 myńnan astam laýazymdy tulǵa jaýapkershilikke tartylǵan edi.
