Eks-bankır Jomart Ertaev qaıta qamaýǵa alynady — depýtat

ALMATY. KAZINFORM — Májilis depýtaty Abzal Quspan 11 jylǵa bas bostandyǵynan aıyrylǵan Jomart Ertaevtyń raqymshylyqqa ilinýi týraly sheshim qaıta qaralǵanyn habarlady. 

Onyń aıtýynsha, Jomart Ertaevqa qatysty sot qaýlysy buzylǵan. 

— Ótinishimdi qoldap, ádil sheshimge yqpal etken Bas prokýratýra, Almaty oblysynyń prokýrory men sotyna, sondaı-aq máseleni alǵash kótergen jýrnalıster qaýymyna alǵys aıtamyn, — dep jazdy ol.

Bul derekke qatysty taǵy bir Májilis depýtaty Ermurat Bapı pikir bildirdi. Ol prokýratýranyń qarsylyq keltirýi boıynsha Jomart Ertaev qaıtadan qamaýǵa alynatyn rastady.

Kazinform agenttigi bul derek boıynsha Almaty oblysynyń sotyna jáne QR Bas prokýratýrasyna resmı saýal joldady.

Eske salaıyq, 2020 jyly RBK Bank-ten 144 mıllıard teńge jymqyrǵany úshin sottalǵan belgili bankır Jomart Ertaev jalpy rejımdegi kolonııadan bosatyldy.

Jomart Ertaev 2018 jylǵy mamyrda Máskeýde Qazaqstan ІІM Interpol ulttyq ortalyq bıýrosynyń suraýy boıynsha ustalǵan. Ol asa iri kólemdegi alaıaqtyq jasady degen kúdikpen halyqaralyq izdeýde bolǵan. 2019 jylǵy naýryzda ol Reseı Federatsııasynan Qazaqstanǵa ekstradıtsııalandy.

Tergeý dereginshe, Ertaev 2011-2017 jyldary qyzmettik ókiletin paıdalanyp, aldyn ala sóz baılasqan tulǵalarmen birge «Bank RBK» AQ-nan 144 mlrd teńge jymqyrdy degen kúdikke ilindi.

Bul iske barlyǵy 54 adam tartylyp, olardyń qatarynda 41 top-menedjer men bank qyzmetkerleri bolǵan.

2020 jylǵy qarashada Almaty soty Jomart Ertaevty 11 jylǵa bas bostandyǵynan aıyrdy.

Bıyl qyrkúıek aıynda raqymshylyqqa ilinip, Jomart Ertaev bostandyqqa shyqty.