Eks-bankır Jomart Ertaev bostandyqqa shyqty

ALMATY. KAZINFORM — 2020 jyly RBK Bank-ten 144 mıllıard teńge jymqyrǵany úshin sottalǵan belgili bankır Jomart Ertaev jalpy rejımdegi kolonııadan bosatyldy.

Qylmystyq-atqarý júıesi komıteti baspasóz qyzmetiniń málimetinshe, sottalýshy jazasyn qylmystyq-atqarý júıesiniń mekemesinde sot úkimine sáıkes ótep kelgen.

– Sot sheshiminiń negizinde oǵan raqymshylyq aktisi qoldanylyp, soǵan baılanysty ol bostandyqqa shyǵaryldy, – dep málimdedi vedomstvo.

Sonymen qatar sottalǵandarǵa qatysty isterdi qaraý jáne sheshim qabyldaý sottyń quzyretinde ekeni naqtylandy. Ertaev aldaǵy ýaqytta baqylaý úshin probatsııa qyzmetiniń esebine qoıyldy.

Eske salaıyq, Jomart Ertaev 2018 jylǵy mamyrda Máskeýde Qazaqstan ІІM Interpol ulttyq ortalyq bıýrosynyń suraýy boıynsha ustalǵan. Ol asa iri kólemdegi alaıaqtyq jasady degen kúdikpen halyqaralyq izdeýde bolǵan.

2019 jylǵy naýryzda ol Reseı Federatsııasynan Qazaqstanǵa ekstradıtsııalandy.

Tergeý dereginshe, Ertaev 2011-2017 jyldary qyzmettik ókiletin paıdalanyp, aldyn ala sóz baılasqan tulǵalarmen birge «Bank RBK» AQ-nan 144 mlrd teńge jymqyrdy degen kúdikke ilindi. Bul iske barlyǵy 54 adam tartylyp, olardyń qatarynda 41 top-menedjer men bank qyzmetkerleri bolǵan.

2020 jylǵy qarashada Almaty soty Jomart Ertaevty 11 jylǵa bas bostandyǵynan aıyrdy. 2021 jylǵy naýryzda oǵan Almatydaǵy úsh bankten qarjy jymqyrý isi boıynsha taǵy úkim shyǵyp, ol qylmystyq topty uıymdastyrǵany jáne alaıaqtyq jasaǵany úshin kináli dep tanylyp, 9 jylǵa sottaldy.

Byltyr eks-bankır Ertaevtyń Almaty, Almaty oblysy jáne Jetisý oblysyna qarasty QAJ departamentiniń №72 mekemesinde otyrǵany habarlanǵan edi.