Eks-ákim Arhımed Muhambetov: Oblystyń eń mańyzdy resýrsy – adamı kapıtal

QOSTANAI. QazAqparat - Bizdiń oblystyń eń mańyzdy resýrsy – adamı kapıtal. Búgin Qostanaı oblysynyń ákimi qyzmetinen bosatylǵan Arhımed Muhambetov áleýmettik jelide post jarııalap, qostanaılyqtarǵa «shynaıy alǵysyn» bildirdi, dep habarlaıdy QazAqparat.

«Qurmetti qostanaılyqtar! Búgin men Qostanaı oblysynyń ákimi qyzmetin aıaqtadym. Osy jyldary biz kóp nárseni bastan ótkerdik. Biz halyqtyń ótinishi men máselesin sheshýge tyrystyq.
Óńirdiń barlyq turǵynyna jan-jaqty qoldaý kórsetip, túsinistikpen qaraǵany úshin alǵysymdy jáne erekshe rızashylyǵymdy bildiremin. Bizdiń oblystyń eń mańyzdy resýrsy – adamı kapıtal.
Oblys halqyna, ardagerler keńesine, ǵylymı jáne shyǵarmashylyq zııaly qaýym ókilderine, máslıhat depýtattaryna, úkimettik emes uıymdarǵa, buqaralyq aqparat quraldaryna jáne áriptesterime shynaıy alǵysymdy bildiremin!», - dedi A.Muhambetov.

Eks-ákim sondaı-aq Qostanaı oblysyna órkendeý tiledi.

Eske salaıyq, búgin QR Prezıdenti Qasym-Jomart Toqaev Arhımed Muhambetovti Qostanaı oblysynyń ákimi qyzmetinen bosatty. Onyń ornyna Soltústik Qazaqstan oblysynyń ákimi bolǵan Qumar Aqsaqalov taǵaıyndaldy.

24 qarasha kúni túnde Qostanaı oblysynyń Arqalyq qalasyndaǵy jylý elektr ortalyǵynda apat boldy. 30 qarashada apattyń boljamdy sebebi ataldy.

Aıta keteıik, buǵan deıin halyqtan keshirim surap, rızashylyǵyn bildirgen postty Pavlodar oblysynyń eks-ákimi Ábilqaıyr Sqaqov jarııalaǵan bolatyn.