Ekrem Imamoǵly Túrkııa prezıdentine kandıdat retinde usynyldy

ASTANA. KAZINFORM – Jeksenbi, 23 naýryz kúni Túrkııanyń oppozıtsııalyq Halyqtyq-respýblıkalyq partııasy (HRP) qyzmetinen ýaqytsha shettetilgen jáne qamaýǵa alynǵan Ystanbul qalasynyń meri Ekrem Imamoǵlyny prezıdenttikke kandıdat etip usyndy, dep habarlaıdy DW aqparat agenttigi. 

HRP praımerızine barlyǵy 15 mln túrik azamaty qatysty — bul eldegi barlyq tirkelgen saılaýshynyń tórtten bir bóligin quraıdy. Olardyń 13,2 mıllıony jalǵyz kandıdat bolǵan Imamoglyǵa qoldaý bildirdi.

Partııa tóraǵasy Ozgýr Ozel Túrkııanyń qazirgi prezıdenti Rejep Taııp Erdoǵandy merziminen buryn prezıdent saılaýyn ótkizý týraly sheshim qabyldaýǵa jáne Ekrem Imamoǵlymen básekelesýge shaqyrdy. 

Dál sol kúni oppozıtsııanyń on myńdaǵan jaqtasy Ystanbul qalalyq ákimshiliginiń aldyna jınalyp, Erdoǵannyń qarsylasyn saıası astarly qýdalaýǵa narazylyq bildirdi.

— Imamoglý bir jaǵynan túrmede otyrsa, ekinshi jaǵynan prezıdenttik jolynda júr, - dep keltirdi AR Ozeldiń mıtıngide aıtqan sózderin. 

Prezıdenttikke jańadan úmitkerdiń zaıyby Dılek Kaıa Imamoǵly da narazylyq bildirýshiler aldynda sóz sóıledi.

Sherýshiler tosqaýyl turǵyzýǵa árekettenip, polıtsııamen qaqtyǵysty, dep habarlaıdy Milliyet basylymy. Onyń málimetinshe, saldarynan 66 narazylyq bildirýshi ustalyp, bes polıtsııa qyzmetkeri jaraqat aldy. 

Buǵan deıin Ystanbul meri Ekrem Imamoǵly arnaıy operatsııa kezinde ustalǵanyn jazǵan bolatynbyz.

Túrkııanyń ІІM Imamoǵlyny qyzmetinen ýaqytsha shettetti.