Ekranǵa táýeldilik balanyń qabiletin tómendetedi — dáriger

ASTANA. KAZINFORM — Ekranǵa kóp qaraıtyn balalar men jasóspirimderdiń zeıini tez buzylyp, aqyl-oıs qurdastarymen salystyrǵanda aıtarlyqtaı tómen bolady. Muny túrik nevropatology Ahmet Onýr Keskın málimdedi, dep jazdy Anadoly.

Sandyq tehnologııa kúndelikti ómirdiń ajyramas bóligine aınaldy. Biraq baqylaýsyz jáne uzaq ýaqyt ekranǵa qaraý mıǵa úlken qaýip tóndiredi. 

Onýr Keskın búkil álemde ómir súrý uzaqtyǵy artqan saıyn saý mıdyń mańyzdylyǵy da artyp kele jatqanyn atap ótti.

— Kárilik kezeńge deıin mıdy saqtaý ómir sapasyna da, adamnyń qoǵamdyq ómirge belsendi qatysýyna da tikeleı áser etedi, — dep atap kórsetti ǵalym.

Keskın Túrkııanyń Densaýlyq saqtaý mınıstrligi salaýatty qartaıýǵa jáne qoǵamdyq densaýlyqqa baǵyttalǵan jobalardy júzege asyryp jatqanyn, biraq qoǵam mı kútiminiń mańyzdylyǵyn jete baǵalamaı otyrǵanyn eske saldy.

Ekrandy shamadan tys paıdalaný zeıindi nasharlatady

Sondaı-aq nevropatolog ekranǵa táýeldiliktiń balalar men jasóspirimderge áserine nazar aýdardy.

Onyń aıtýynsha, osy saladaǵy kóptegen ǵylymı zertteýler uqsas nátıjelerge qol jetkizgen.

— Zeıin tapshylyǵynyń buzylýy ekrandy belsendi paıdalanatyn balalar men jasóspirimderde jıi kezdesedi jáne olardyń aqyl-oı qabiletteri qurdastaryna qaraǵanda aıtarlyqtaı tómen. Olardyń oqý úlgerimi aıtarlyqtaı nasharlap, áleýetin iske asyrýǵa eleýli kedergiler jasaıdy. Biz múmkindiginshe ekrandardy ómirimizden alyp tastaýymyz kerek. Bul múldem múmkin bolmasa, balalar men jasóspirimder úshin múmkindiginshe paıdalanýdy shekteý óte mańyzdy, — dedi nevropatolog.

Eske salaıyq, buǵan deıin ǵalymdar Altsgeımer aýrýyn emdeýde úmit kúttiretin jańalyq ashqanyn jazǵan bolatynbyz.