Ekpeniń arqasynda kóptegen aýrýlar tyıyldy - dáriger ımmýnolog
ALMATY. QazAqparat – Ekpeni adamdardyń alýyn mindetteý qajet pe, joq pa? Bul búgingi tańda qoǵam arasynda qyzý pikirtalas týdyryp otyrǵan máselelerdiń biri.
Osy rette biz maman retinde Almatydaǵy № 11 emhananyń ımmýnolog dárigeri Qatııa Tajıevanyń pikirin bilgendi jón kórdik.
25 jyl boıy bala dárigeri jáne ımmýnolog bolyp qyzmet etip kele jatqan Qatııa Tajıeva qazirgi tańda ekpemen basqarylatyn juqpaly aýrýlardyń 10-nan astam túri baryn aıtty.
«Sońǵy jyldary dıfterııa, sal, sirespe, kókjótel aýrýlarynan ólim-jitim joqtyń qasy. Bul nátıjege kóp jyldar boıy jasalǵan belsendi vaktsınatsııalaýdyń arqasynda jetip otyrmyz. Balalarda buryn jıi kezdesetin pnevmonııa, vırýsty gepatıttiń A túri aýrýy da kúrt azaıdy. Qazirgi kúni ekpeden bas tartý qajet degen pikirler de aıtylyp qalyp jatyr. Onyń negizgi sebebi, ata-analardyń durys aqparat almaǵandyǵynan jáne atalǵan juqpaly aýrýlardy ómirinde múlde kezdestirmegendiginen dep túsinemin. Biz medıtsına qyzmetkerleri tájirıbemizde aýrýlardyń kóptegen túrin, sonyń ishinde sal aýrýynan keıingi parez-paralıchpen múgedek bolǵan naýqastar, kókjótel aýrýynyń aýyr formasynda qulaq, kóz, murynnan qan ketýlermen qatar ustamaly jóteldiń 5-6 aıǵa deıin sozylýy, qyzylsha aýrýynan entsefalıtke, menıngıtke asqynýlar, qyzamyq (krasnýha) juqpasyn juqtyrǵan júkti áıeldiń kóptegen aqaýlarmen (tańdaı men ústińgi erinniń bitispeýi, júrektiń týa bitken aqaýy) sábıdi dúnıege ákelýi sııaqty jaǵdaılar óte kóp kezdestirdik. Mundaı mysaldy myńdap keltirýge bolady», - dedi maman.
Dáriger ekpeniń keri áserleri de bolatynyn, alaıda ol naýqastyń densaýlyǵyn durys baǵalaı bilmegennen bolatynan aıtady.
«Shynymen de vaktsınatsııadan keıin kezdesetin jaǵymsyz áserlerdi joqqa shyǵarmaımyz. Ekpege kelgen balanyń densaýlyǵyn dáriger jıyntyqty durys baǵalap egiletin bolsa jaǵymsyz áserler bolmaıdy. Biraq kez kelgen aýrýdy ekpemen baılanystyrý durys emes. DTsP, aýtızm, mıǵa qan quıylý sııaqty aýrýlar qursaqishilik ınfektsııanyń saldarynan, júktilik kezindegi syrtqy, ishki faktorlardan damýy ábden mýmkin. Sondyqtan men pedıatr, ımmýnolog, kópbalaly ana retinde ekpe egýdiń bala densaýlyǵy úshin óte mańyzdy ekenin aıtqym keledi! Aýyryp em izdegenshe, aýyrmaıtyn jol izdeıik», - dedi №11 qalalyq emhananyń ımmýnolog dárigeri Tájıeva Qatııa.
