Ekpege qarsy shyǵatyndar dári-dármek saýdasynan paıda kórip otyr - Jandarbek Bekshın
ASTANA. QazAqparat - Qoǵamdyq densaýlyqty saqtaý komıtetiniń tóraǵasy Jandarbek Bekshın ınternettiń kómegimen emdeletinderge keńes berdi, dep xabarlaıdy QazAqparat tilshisi.
«Ókinishke qaraı, búginde kóp adam «professor Internettiń» kómegine júginedi. Sóıtip, óz betinshe emdeledi. Olar san alýan ǵalymdardyń jazǵandaryn oqıdy da, sonyń bárine ımandaı senedi. Al ınternetke shyqqan aqparattyń shyn-ótirigin tekserip jatqan eshkim joq», - dedi J.Bekshın Astanada ótken baspasóz máslıxatynda.
Bas sanıtardyń aıtýynsha, tumaý, menıngıt pen qyzylsha sııaqty aýrýlar asqynyp turǵanda farmatsevtıkalyq kompanııalar kóp paıda tabady. Al ekpe alýǵa qarsy shyǵatyndar «vaktsına alýǵa bolmaıdy» dep, olarǵa kómektesip otyrady.
«Baıqap qarasańyz, epıdemıologııalyq jaǵdaı qıyndap turǵanda dárixanalarda adamdardyń kezegi kóbeıedi. Dál osy kezde farmatsevtıkalyq kompanııalar óz paıdasyn jınaıdy. Sosyn vaktsınaǵa qarsy shyǵatyn dúmshelerdi kóp tyńdaı bermeńizder. Máselen, aýrýlar asqynyp ketkende ondaılar birden kórinbeı ketedi, ylǵı solaı. Bylaı qarasań, óz isterin jasap alady da, joq bolyp ketedi. Endi, olar dári-dármekten túsip jatqan tabystan óz paıdalaryn kórip otyr ǵoı. Sebebi xalyq arasynda ınfektsııalyq aýrýlar tarap ketti. Naýqastar kóp bolǵan saıyn paıda kóp túsedi», - dep atap kórsetti J.Bekshın.
Onyń sózine qaraǵanda, ınfektsııalyq aýrýlardy emdeý úshin antıbıotıkter qoldanylady. Al vırýstar ondaı dári-dármekke tez beıimdeledi de, ýaqyt óte kele, adam aǵzasy oǵan qarsy tura almaıdy. Sondyqtan aýrýdyń aldyn alý úshin ekpe jasaý qajet.
Aıta keteıik, búgin komıtet tóraǵasy qyzylsha aýrýyna qatysty kezekti baqylaý sharalarynyń nátıjesin jarııalady. Oǵan sáıkes, Astana qalasynda qyzylshanyń kórsetkishi ortasha deńgeıden asyp ketken. Sońǵy bir aptanyń ishinde respýblıka boıynsha qyzylshaǵa 438 adam shaldyqqan. Olardyń ishinde 282 adam - 14 jasqa deıingi balalar. Osylaısha, qyzylshamen aýyryp qalǵandardyń 65 protsenti balalardyń arasynda tirkelip otyr. Astanada on adam jansaqtaý bóliminde jatyr.
Respýblıka boıynsha qyzylsha aýrýy, kóbinese, ekpe almaǵan balalardyń arasynda jıi kezdesedi. Olardyń úlesi 60 protsentti qurap otyr. Balalardyń kóbisi ekpe salatyn jasqa - 12 aıǵa jetpegen. Osyǵan baılanysty bıyl qyzylshaǵa qarsy ekpeni 9 aıdan bastap salýǵa sheshim qabyldandy.
Sońǵy kezde Qazaqstanda qyzylshanyń jańa mýtatsııasy tarala bastady. Atalǵan aýrýdyń ınkýbatsııalyq kezeńi 20 kúnge deıin sozylady. Osy ýaqyttyń ishinde qyzylshasy bar adam basqa bireýge aýrýdy op-ońaı juqtyra alady. Sebebi vırýs aýa arqyly taralady jáne naýqas otyrǵan jerde eki saǵatqa deıin saqtalady. Inkýbatsııalyq kezeń bolǵanda adamnyń ózi qyzylshamen aýyryp júrgenin bilmeýi de múmkin. Sondyqtan mektepke, dúkenge, jumysqa jáne basqa da qoǵamdyq jerge baryp, vırýsty taratyp júre beredi. Al ekpe almaǵandar ony 90 protsentke juqtyra alady. «Qyzylshanyń genetıkalyq tarmaqtary, ıaǵnı mýtatsııaǵa jatatyn Dublin jáne Kabul tarmaqtary bar. Osy eki serotıp Qazaqstanda eshqashan bolǵan joq. Máselen, Astanada eń aýyr 18 jaǵdaıdy zerttegende sol adamdardan Kabul-dyń 70 protsenti jáne Dublin-niń 30 protsenti shyqty. Kabul serotıpi kóbinese Azııadan keledi. Al Dublin Eýropa elderinde jıi kezdesedi. Bári sol jaqtan kelip jatyr», - deıdi J.Bekshın.
