Ekpeden bas tartqan ata-analar zań aldynda jaýap beredi
Vıtse-mınıstr Alekseı Tsoıdyń aıtýynsha, ondaı jaýapkershilik densaýlyq saqtaý týraly jańa kodekske engizilýi múmkin.
«Qazirgi kezde biz qoǵamdyq uıymdarmen, jalpy, jurtshylyqpen osy máseleni keńinen talqylap jatyrmyz. Sebebi adam aýyryp júrse de, basqalardyń densaýlyǵyna nemquraıly qarasa, tıisti em-domdy qolǵa almasa, oǵan qarsy bir shara bolý kerek dep oılaımyz. Máselen, menıngıt bar. Onymen aýyrǵan adam ınfektsııanyń qaýipti ekenin bile tura, kóp halyq otyrǵan jerge kelse, qaýipti emes pe? Sondyqtan biz osy máseleni keńinen qarastyryp jatyrmyz. Árıne, adam quqyqtary jáne taǵy basqa jaıttar bar», - dedi A.Tsoı jýrnalısterge bergen suhbatynda.
Onyń aıtýynsha, vaktsına máselesi de solaı. Memleket aýrýǵa qarsy em-domdy usynady. Alaıda keıbir adamdar ony bile tura, vaktsınatsııadan bas tartady. Demek, jeke jaýapkershilik máselesi týyndaıdy.
«Sosyn ol adam vaktsınadan bas tartqannan keıin aýyryp qalsa, ony memlekettiń aqshasyna qaıtadan emdegen qanshalyqty ádiletti? Osy jaǵyn da qarastyrýymyz qajet», - dep atap kórsetti A.Tsoı.
Al Bas sanıtar Jandarbek Bekshınniń sózine qaraǵanda, búginde vaktsınatsııadan bas tartatyn azamattardyń sany azaıyp keledi.
«Ashyǵyn aıtý kerek, vaktsınadan bas tartýdyń negizgi sebebi - dinı kózqaras. Ondaı adamdardyń sany 60 protsentten asyp otyr. Olar teledıdar kórmeıdi, gazet-jýrnal oqymaıdy, gadjetterdi paıdalanbaıdy. Biz ondaı adamdardyń árbireýimen jeke-jeke jumys isteımiz. Máselen, 2016 jyly 250 adam óz kózqarasyn ózgertse, aǵymdaǵy jyly 8 aıdyń ishinde ondaı adamdardyń sany 2220-ǵa jetti», - deıdi J.Bekshın.
Aıta keteıik, búgin QR Densaýlyq saqtaý mınıstrliginde ınfektsııalyq aýrýladyń aldyn alý jónindegi respýblıkalyq shtabtyń otyrysy ótti. Sol jerde Astana men Mańǵystaýdaǵy menıngokokk ınfektsııasyna qatysty sońǵy derekterdi jarııalady.
Sondaı-aq, mınıstrlik dárigerdiń naýqasty tepkileý oqıǵasyna qatysty óz ustanymyn bildirdi.