Ekpe jumystary arqasynda sońǵy 10 jyl ishinde kóptegen aýrýlardyń taraýy tómendep, keıbiri joıyldy - M. Omarova
ALMATY. 20 sáýir. QazAqparat /Ádilet Musahaev/ - Juqpaly aýrýlardyń aldyn alýǵa arnalǵan egý jumystary kóptegen aýrýdyń tómendeýine, keıbiriniń joıylýyna ákeldi.
Bul jaıynda búgin H.Jumatov atyndaǵy gıgıena jáne epıdemologııa ǵylymı ortalyǵynyń dırektory Marııa Omarova Almatyda aranıy ótken baspasóz máslıhaty kezinde aıtty.
Onyń sózine qaraǵanda, úlken máselege aınalyp otyrǵan mundaı egý jumystaryna jyl saıyn 4 mıllıardqa jýyq teńge bólinedi eken. «Bizdiń jurtshylyq, sonyń ishinde balalar egýdi tegin alady. Sonyń arqasynda 10 jyl ishinde kóptegen aýrýlardyń taraýy tómendep, keıbiri joıyldy. Máselen, V vırýsty gepatıtpen syrqattaný deńgeıi turǵyndar arasynda 4 esege tómendese, osy ınfektsııaǵa qarsy ekpe saldyrǵan balalar arasynda 52 esege, qyzylshamen syrqattaný 72 esege, súzek 3,6, epıdemııalyq parotıt 13 esege azaıǵan. Al 2002 jyly ekinshi ekpeni engizýge baılanysty parotıtpen syrqattaný 37 esege kemigen», -deıdi ol. Sonymen qatar 1995 jyldan bastap elimizde buryn ómir boıy múgedek bolýdy týyndatatyn polımelıt Qazaqstanda joıylǵandyǵyn jetkizdi.
Sonymen qatar ol ýaqyt ótken saıyn vaktsınalardyń jańa túrleri shyǵyp jatqandyǵyn aıtady. «Ǵalymdar balalar arasynda ókpe aýrýyn qalaı tómendetý kerektigin qolǵa alyp, pnevmokokqa qarsy vaktsına shyǵaryp, ony iske asyrýda. Osy tusta halyqqa durys maǵlumat berý kerek», -deıdi M. Omarova.
