Ekpe týraly «Facebook» «sarapshylaryna» emes, mamandarǵa júgingen jón - ulttyq ortalyq
«Qoǵamda qyzyq úrdis paıda boldy, ekpege qarsy qozǵalys qoǵamǵa qysym jasap, ekpe egýdiń esh qajeti joq dep júr. Árıne, uzaq jyl ótti, adamzattyń qyrylýyna ákep soqqan indetti juqpaly aýrýlardy qashan kórgenimiz este joq. Adamdar ony umytty da, vaktsınaǵa qarsy qozǵalysty úgittep júr. Mejeli shekke jaqyndap qaldyq. Odan assaq, adamdar ekpeden bas tartyp, vaktsına arqyly eńsergen, áldeqashan umytylǵan aýrýlar qaıta qozyp, adam ólimi kóbeıýi múmkin. Facebook-tegi «sarapshylardyń» sózderi kózsiz senetin aqıqat emes. Suraq týyndasa, mamandarǵa júgingenińiz jón», - dedi Arnur Nurtaev.
Onyń aıtýynsha, Qazaqstannyń Densaýlyq saqtaý mınıstrligi álemdik tájirıbege súıenip, zańnamaǵa ekpe salýdy mindetteý týraly ózgeris engizý boıynsha jumys istep jatyr.
«Óıtkeni, vaktsınadan bas tartatyndar kóbeıdi. Іs nasyrǵa shapqan soń, «Biz eskerttik» dep otyrǵymyz kelmeıdi. Qazir máseleniń aldyn alýǵa tyrysyp jatyrmyz. Ókinishke qaraı, barlyq depýtattar men qoǵam bul zań jobasyna qoldaý kórsetpeı otyr. Kerisinshe, bul normany ótkizbeýge kúsh salyp jatqandar bar. Aıyptaýlar men kúmán keltiretinder kóbeıdi. Bizdiń esigimiz bárine ashyq - saraptamany qalaı júrgizemiz, sapany qalaı baǵalaımyz, bárin kórsetip-túsindirýge daıynbyz», - dedi ol.
Sonymen birge, ortalyq basshysy vaktsınaǵa qatysty Eýropa elderiniń tájirıbesin mysalǵa keltirdi.
«Germanııada ekpeden bas tartqandarǵa aıyppul salady. Frantsııada ekpe salmaǵan balany mektepke kirgizbeıdi. Shveıtsarııada adam vaktsınaǵa mindettelgen jáne ózderi satyp alýy tıis. Qazaqstanda bári tegin. Islamǵa kelsek, musylmandar ekpe saldyrmaıdy degen qate túsinik bar. Saýd Arabııasyna qajylyqqa barý úshin de birneshe aýrýdan qorǵaıtyn ekpe týraly anyqtama kórsetý qajet», - dedi A. Nurtaev.