Ekpe saldyrýǵa beı-jaı qaramaýymyz kerek - Abdýlhahlıl Dolkýntaı

ALMATY. QazAqparat —Koronavırýsqa qarsy kúresýdiń eń tımidi joly - ekpe saldyrý. Ol týraly Kazakstan halqy Assambleıasynyń múshesi, «Metall Prom Group» JShS Bas dırektory, Almaty qalasyndaǵy Qazaqstan uıǵyrlarynyń respýblıkalyq etnomádenı ortalyǵy fılıalynyń tóraǵasy Abdýlhahlıl Dolkýntaı QazAqparat tilshisine aıtyp berdi.

- Іndetten qutylýdyń eń durys joly - ol ekpe saldyrý. Álemniń damyǵan, ozyq elderi bul úrdisti áldeqashan bastap ketti. Bizdiń Elbasymyz Nursultan Nazarbaev pen Prezıdentimiz Qasym-Jomart Toqaev halyqtyń egilýine jaǵdaı jasap, úlken qoldaý bildirip otyr. Biz el bolyp, bul máselege beı-jaı qaramaı, jaýapkershilikpen kelgenimiz durys dep oılaımyn,-dedi A.Dolkýntaı.

Onyń aıtýynsha pandemııany tek ekpe saldyrý toqtata alady.

- Men byltyr aýyryp shyqqam, denemde indetke qarsy antıdeneler qalyptsasqanmen, bıyl qosymsha egildim. Qazir meniń otbasy múshelerim, men basqaratyn ««Metall Prom Group» JShS» ujymy, bárimiz de egilýdemiz. Eger bárimiz dárigerlerdiń aıtqanyn oryndap, vırýsqa qarsy ekpe saldyrar bolsaq, onda bul indetten tezirek qutylatyn bolamyz dep oılaımyn, - dedi A. Dolkýntaı.

Eske sala keteıik, Almatyda koronavırýstan bir aılyq náreste kóz jumǵan edi. Bul jaıynda onlaın brıfıng barysynda qalalyq qoǵamdyq densaýlyq saqtaý basqarmasynyń bastyǵy Narıman Tabynbaev málimdegen edi. Al Almaty qalasy sanıtarııalyq-epıdemıologııalyq baqylaý departamentiniń basshysy, qalanyń bas memlekettik sanıtar dárigeri Jandarbek Bekshınniń aıtýynsha, Almaty qalasynda koronavırýs boıynsha epıdemıologııalyq jaǵdaı áli de kúrdeli. Táýligine 1500- den astam jaǵdaı turaqty túrde tirkelip otyr. Ol Almaty qalasyndaǵy epıdemıologııalyq jaǵdaı kontagıozdy mýtatsııalanǵan «delta» shtamynyń taralýyna baılanysty kúrdelene túskenin de atap ótti.

Dýman Arǵyngeldi.

Foto: astana.atameken.kz