Ekpe saldyrǵandar EGov-tan elektrondy vaktsınatsııa pasportyn júkteı alady

NUR-SULTAN. QazAqparat - Qazaqstanda EGov Mobile qosymshasynyń «tsıfrlyq qujattar» bóliminen vaktsınatsııanyń elektrondy pasportyn alýǵa bolady, dep habarlaıdy QazAqparat.

Bul jaıynda QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın Facebook paraqshasynda jazdy.

«EGov Mobile qosymshasynyń «tsıfrlyq qujattar» bóliminde vaktsınatsııanyń elektrondy pasporty qoljetimdi. Onda aqparat úsh tilde kórsetiledi: adam qandaı preparattar aldy, qandaı dozany jáne qaı kúni qoldanǵany tur. Siz qujatty talap etken jerde kórsete alasyz jáne QR kodyn qoldana otyryp qajetińizge jaratasyz» dep jazdy mınıstr.

Onyń aıtýynsha, qazir IATA halyqaralyq áýe kóligi qaýymdastyǵymen yntymaqtastyq máselesi qaralyp jatyr.

«Vaktsınatsııanyń bizdiń elektrondy pasportty qabyldaý jáne halyqaralyq júıelermen kelisim ornatý mańyzdy. Bul baǵytta ári qaraı jumys isteýimiz kerek. Aqparat retinde Siz EGov Mobile-da vaktsınatsııa pasportyn teksergen kezde joǵarǵy oń jaqtaǵy «Jańartý» batyrmasyn basqan kezde tsıfrlyq qujattaǵy pasport ekinshi «dozany» alǵannan keıin ǵana kórsetiledi» deıdi Baǵdat Mýsın.