Ekpe pýnkterinde vaktsınanyń qansha dozasy bar

NUR-SULTAN. QazAqparat – El aýmaǵyndaǵy ekpe pýnktterinde koronavırýs vaktsınasynyń 2,3 mıllıonnan astam dozasy bar. Bul týraly Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Búgingi tańda vaktsınanyń birinshi komponentin 6,4 mln adam qabyldady. Vaktsına alýǵa jatatyn halyqtyń qamtylý deńgeıi – 62 paıyz. Ekinshi komponentti 5 mıllıonnan astam adam aldy. Vaktsına alýǵa jatatyn halyqtyń 50 paıyzy qamtyldy. Vaktsınatsııamen qamtý deńgeıi boıynsha eń joǵary kórsetkish 9 óńirde – Shymkent, Almaty, Nur-Sultan qalalary men Túrkistan, Soltústik Qazaqstan, Shyǵys Qazaqstan, Qyzylorda, Aqmola, Atyraý oblystarynda tirkeldi», - dedi vedomstvo basshysy,

Onyń aıtýyna qaraǵanda vaktsıannyń birinshi dozasyn alǵandardyń eń tómengi kórsetkishi Mańǵystaý oblysynda tirkelgen – 38 paıyz.

«Barlyq ekpe pýnktterinde birinshi komponenttiń 1,4 mln dozasy, ekinshi komponenttiń 940 myń dozasy bar. Jetkizý keste boıynsha jalǵasyp jatyr», - dedi Alekseı Tsoı.

Sondaı-aq, ol Úkimet otyrysynda kúzdegi epıdahýaldyń úsh stsenarııdegi yqtımal boljamyn aıtty.

«Mınıstrlik qarasha aıyna deıingi epıdemıologııalyq boljamdy jańartty. Pessımıstik stsenarıı boıynsha qyrkúıek aıynda 6 300 jaǵdaıǵa, qazan aıynda 2 400 jaǵdaı jetedi. Shynaıy stsenarıı boıynsha qyrkúıekte 5 400 jaǵdaıǵa, qazanda 1 800 jaǵdaıǵa jetedi. Optımıstik stsenarıı jaǵdaıynda qyrkúıekte 4 200 jaǵdaıǵa, qazanda 1 300 jaǵdaıǵa jetedi», - dedi mınıstr.