Ekpe almaǵan balalardyń sabaqqa qatysýyna shekteý engizilýi múmkin be
ASTANA. KAZINFORM — Eger topta nemese synypta ujymdyq ımmýnıtet bolmasa, ekpe almaǵan balalardyń mektepter men balabaqshalarǵa barýyna tyıym salynýy múmkin. Bul týraly QR Densaýlyq saqtaý vıtse-mınıstri Manas Ramazanov aıtty.
Búgin Quryltaıda tilshiler vedomstvo ókilinen aýrýdyń taralýy qarqyn alǵan jaǵdaıda, ekpe almaǵan balalardyń mektepter men balabaqshalarǵa barýyn ýaqytsha shekteý jóninde sheshim qabyldaý múmkindigi týraly surady.
— Qazirgi ýaqytta tıisti buıyryq bar. Ásirese, bul jaǵdaı qyzylshaǵa qatysty. Eger ujymdyq ımmýnıtet qalyptaspaǵan bolsa, mektepke deıingi mekemelerge nemese mektepterge barýǵa tyıym salynady. Mysaly, eger toptaǵy nemese synyptaǵy balalardyń basym bóligi ekpe alǵan bolsa jáne ekpe almaǵan bir balanyń bolýy sol toptyń ujymdyq ımmýnıtetine qaýip tóndirmese, onda ol balaǵa oqý ornyna barýǵa ruqsat etiledi. Degenmen ár jaǵdaı jeke qarastyrylýǵa tıis. Synyptaǵy nemese toptaǵy balalardyń kópshiligi ekpe almasa, onda mektepke deıingi mekemelerge nemese mektepterge barýǵa tyıym salynady, — dedi Manas Ramazanov.
Eske salsaq, qyzylshanyń ári qaraı taralýynyń aldyn alý maqsatynda QR Bas memlekettik sanıtarlyq dárigeriniń 2026 jylǵy 19 aqpandaǵy № 3 «Qazaqstan Respýblıkasyndaǵy qyzylsha boıynsha sanıtarııalyq-epıdemııaǵa qarsy jáne sanıtarlyq-profılaktıkalyq is-sharalardy uıymdastyrý jáne ótkizý jónindegi sharalar týraly» qaýlysy qabyldandy.