E.Qoshanov lýdomanııaǵa qarsy zań týraly: Qoǵamnyń taǵy bir dertine tosqaýyl qoıyldy
ASTANA. KAZINFORM – Májilis tóraǵasy Erlan Qoshanov áleýmettik jelidegi paraqshasynda Prezıdent búgin qol qoıǵan lýdomanııaǵa qarsy zań týraly pikir bildirdi.
«Búgin Prezıdent kópten kútip júrgen zańnyń biri – lýdomanııaǵa qarsy túzetýlerge qol qoıdy. Bul qubylystan tónip turǵan qaýiptiń aýqymy týraly Qasym-Jomart Kemeluly talaı ret aıtty. 2023 jyldyń kúzinde osy másele boıynsha Qaýipsizdik keńesiniń arnaıy otyrysy da ótken bolatyn. Sol kezde azamattar arasyndaǵy qumar oıynǵa táýeldilikpen kúreske baǵyttalǵan zańnamany, uıymdastyrýshylyq jáne aqparattyq-ıdeologııalyq sharalar keshenin qabyldaý týraly tapsyrma berildi. Bıylǵy naýryzda ótken Ulttyq quryltaı otyrysynda Memleket basshysy lýdomanııany búgingi Qazaqstannyń bes áleýmettik problemasynyń biri dep atady. Eń qorqynyshtysy, oıynǵa degen táýeldilik jastardyń arasynda qatty tarap jatyr. Otbasylardyń ajyrasýyna, túrli qylmystardyń bastapqy sebebine aınalyp otyr», - dep jazady Májilis spıkeri.
Sondaı-aq, ol lýdomanııa tek qazaqstandyqtar úshin emes, álem halqy úshin ózekti máselege aınalǵanyn eske salady.
«Bul jańa zań arqyly memleket atalǵan áleýmettik keselge tosqaýyl qoıyp otyr. Birinshiden, býkmekerlik keńseler men totalızatorlardyń jarnamasy shekteledi. Ǵımarattardyń syrtyndaǵy, mass-medıadaǵy, kıno men vıdeodaǵy, anyqtamalyq qyzmetterdegi, SMS taratýlar arqyly jasalatyn qumar oıyn jarnamasyna tyıym salyndy. Ekinshiden, zań Biryńǵaı tizilimdegi boryshtylarǵa, 21-ge kelmegen azamattarǵa, óz-ózin qumar oıyn men bás tigýden shekteıtinin málim etken adamdarǵa qumar oıynǵa qatysýǵa tyıym salady. Sondaı-aq, memlekettik qyzmetshiler men áskerı qyzmetshilerge, arnaıy memlekettik organ ókilderine de qumar oıynǵa qatysýǵa tyıym salyndy. Bul talap buzylsa, jumystan qýylady», - deıdi Erlan Qoshanov.
Zań oıyn mekemeleri men, býkmeker keńselerine, totalızatorlarǵa biryńǵaı tıptik ereje engizýdi kózdeıdi. Májilis tóraǵasynyń paıymdaýynsha, bul atalǵan mekemelerdiń jumysyn túsinikti ári ashyq etedi.
«Taǵy bir mańyzdy qadam – Qazaqstan aýmaǵynda onlaın kazınolarǵa tyıym salyndy. Bul talapty buzǵan adam eki jylǵa deıin bas bostandyǵynan aıyrylýy múmkin. Týrızm jáne sport mınıstrligine búkil lıtsenzııasy joq sheteldik býkmekerlik keńseler men totalızatorlardyń tizimin júrgizetin ókilet berildi. Al bankter men tólem uıymdaryna onlaın kazınolardyń paıdasyna qarjylyq operatsııalar júrgizýge tyıym salyndy. Túrli lotereıa ónimderiniń ashyq qoljetimdiligi de shekteledi. Endi ol arnaıy ınternet-resýrs arqyly ǵana satylady. Kóshelerde tek klassıkalyq lotereıa bıletterin satatyn dúńgirshekter ǵana qalady», - deıdi E.Qoshanov.
Palata basshysy lýdomanııaǵa qarsy zań búkil qoǵamnyń suranysynan týyndaǵanyn aıtady.
«Bul zańnyń jan-jaqty pysyqtalýy, oǵan barsha qoǵamnyń atsalysýy búgin Memleket basshysy qol qoıǵan qujattyń qoǵamymyzdy aıtarlyqtaı saýyqtyratynyna senim beredi. Depýtattar bul máseleni áli de baqylaýda ustaıdy», - dep jazdy Májilis tóraǵasy.
