Ekonomıster otbasy baqytyn qamtamasyz etýdegi áıelderdiń jyldyq úlesin 652 myń dollarǵa baǵalap otyr
ASTANA. Naýryzdyń 15-i. QazAqparat - Bala tárbıeleý, úıdi taza ustaý jáne otbasy baqytyn qamtamasyz etý jónindegi qazirgi zamanǵy eýrpalyq áıelderdiń eńbegi qansha turady degen saýalǵa jaýap izdegen brıtandyq ekonomıster, áıelderdiń otbasy-oshaq basyndaǵy eńbegin jylyna 652 myń AQSh dollarǵa baǵalap otyr.
Bul týraly "Deılı telegraf" gazeti jazýda.
Zertteý jumystarynyń barysynda sotsıologtar men ekonomıster áıelderdiń otbasynda tegin atqaratyn, biraq sáıkes qyzmetter qoldanystaǵy preıskýrant boıynsha saǵatyna aqy alatyn jumystardyń qunyn anyqtaǵan. Sóıtse, áıelder jylyna 27 myń dollarǵa ydys-aıaq jáne kir jýady, 97 myń dollarǵa tamaq ázirleıdi, 18 myń dollarǵa bala tárbıeleıdi eken. Oǵan qosa, kelinshekter avtokóliktiń rýline otyryp úı sharýashylyǵyn júrgizýmen jáne balalardy mektepke jetkizýmen baılanysty basqa da jumystar atqaryp, 45 myń dollardyń jumysyn atqarsa, býhgalterlik esep-qısapty júrgizip 30 myń dollardyń jumysyn isteıdi.
Brıtandyq sotsıologtar áıelderdiń otbasyndaǵy «rýhanı rolin» 45 myń dollarǵa baǵalasa, túrli otbasylyq isterdegi «keńesshilik» qasıetin 225 myń dollarǵa baǵalap otyr.
Bul esepke sonymen birge, otbasy múshelerine medıtsınalyq kómek kórsetý, dúkenge barý, otaǵasyna keńester berý sııaqty «qyzmetter de» kirip otyr. Nátıjesinde, eger áıelder otbasynda atqarylǵan jumystary úshin aqy alatyn bolsa, onda jyl saıyn 652 myń dollar tapqan bolar edi, deıdi sarapshylar.
