Ekonomıster bıýdjettiń talan-tarajǵa túsýin jýrnalısterdiń ámbebaptyǵynan da kóredi
ASTANA. QazAqparat - Tanymal sarapshy, ekonomıka ǵylymdarynyń kandıdaty, professor Jankeldi Shymshyqov Qazaqstanda ekonomıka taqyrybyn tereń qaýzaıtyn jýrnalısterdiń tapshylyǵyna alańdaıdy.
Onyń aıtýynsha, osynyń saldarynan bıýdjet qarajatyna halyqtyq baqylaý júrgizilmeı keledi. Al mundaı olqylyqty biletin keıbir sheneýnikter esh qoryqpastan bıýdjet qarajatyn mıllıardtap urlaýǵa da baryp jatyr. Bundaı pikirdi ol QazAqparat tilshisine bergen suhbatynda bildirdi.
«Buryn jýrnalıstıka fakýltetterinde ekonomıkany jaqsy oqytty. Saıası ekonomıka, óndiristik ekonomıka, aýyl sharýashylyǵy ekonomıkasy jáne taǵy basqa da sabaqtar kóp bolatyn. Qazir osynyń basym bóligin alyp tastady. Sosyn eki jyl boldy, jýrnalıstıka fakýltetterinde ǵana emes, fılologııa fakýltetterinde de ekonomıka pánderin qysqartyp jatyr. Fılologııadan jýrnalıstıkaǵa mamandardyń jıi aýysatyny bárimizge málim. Sóıtip, ekonomıkalyq teorııa bolmaǵannan keıin jýrnalıster taqyrypty durys asha almaıdy. Sonyń saldarynan qarapaıym halyqqa osy saladaǵy jańalyqtar túsinikti tilde jetpeı jatyr», - deıdi Jankeldi Shymshyqov.
Bul rette sarapshy osy máselege baılanysty Bilim jáne ǵylym mınıstrligine usynys jasaý qajettigin alǵa tartady.
Onyń aıtýynsha, búginde jýrnalıster «ámbebap» bolyp, naqty bir taqyrypqa tereńirek úńile almaı otyr. Respýblıkalyq bıýdjettiń qalaı quralatynyn, ony oblystarǵa taratý men naqty jobalarǵa jumsalý jaǵyn da jýrnalıster bilińkiremeıdi. Bilmegennen keıin ol baspasózde jazylyp, jarııalanbaıdy. Al halyqqa bıýdjettiń jumsalý jaǵy BAQ arqyly túsinikti tilmen jetpegendikten memleket qarajatyna qoǵamdyq baqylaý jasaý múmkin emes.
«Máselen, buryn halyqtyq baqylaý degen bolatyn. Árbir sala boıynsha qatań qadaǵalaý jasalyp turdy. Qazir halyqtyq baqylaý sharalary báseńdep qalǵannan keıin bıýdjet qarjysyn joǵary shendilerdiń ózderi de urlap jatyr. Ásirese, qoǵam tarapynan, buqaralyq aqparat quraldary tarapynan tolyqqandy ári der kezinde baqylaý júrgizilmeıdi. Ekonomıkany biletin jýrnalıster der kezinde dabyl qaǵyp, máseleni kóterse, biraz aqshany saqtap qalýǵa bolatyn edi. Iá, búginde Esep komıteti respýblıkalyq bıýdjettiń atqarylýyn baqylaıdy. Degenmen, olardyń baqylaý jumysy jyldyń sońynda júrgiziledi. Ol kezde biraz kemshilikter anyqtalady, biraq bıýdjet qarajaty «qumǵa sińgen sýdaı» bolyp, ketetin jaǵyna ketip qalady. Al osyny bilgir jýrnalıster basynan nazarda ustasa, bıýdjettiń tıimsiz jumsalýyna jol bermeýge bolatyn edi», - dep atap kórsetti ekonomıst.
Aıta keterligi, ekonomıst Shymshyqovtyń usynysyn áriptesi Baýyrjan Ysqaqov ta qoldap otyr. Onyń sózine qaraǵanda, ekonomıka taqyrybyna qalam terbep júrgen jýrnalısterdiń qazirgi daıyndyǵy kóńil kónshiterlik emes.
«Endi, biz televızııalyq baǵdarlamalarǵa, san alýan ekonomıkalyq saraptamalarǵa bergen suhbattarymyzdy artynan qarap jatamyz ǵoı. Sonda jýrnalıster bizdiń sózimizdi negizge alyp, óz oılarymen qorytyndylap otyrady. Árıne, ol da durys. Degenmen, sol túıinde biraz nárseniń jetispeıtindigin baıqaımyz. Ekonomıster naqty bir tsıfrlarmen sóıleıdi. Ony jýrnalıster qarapaıym tilmen halyqqa jetkizýleri kerek edi. Osy jaǵy kemshin. Efırge shyqqan suhbattyń ózinen biraz «áttegen-aı»-lar bolyp jatady», - deıdi Ysqaqov.
