Ekonomıkanyń ósý qarqynyn saqtap qalýymyz kerek – Premer-Mınıstr
«Naqty sektor turaqty ekonomıkalyq ósimdi qamtamasyz etti. Óńdeýshi ónerkásip, qurylys jáne aýyl sharýashylyǵy salalarynyń damý qarqyny jaqsy. Ónerkásip sektory óndiristiń 1,5%-ke, onyń ishinde óńdeý salasynyń 1,6%-ke óskenin kórip otyrmyz», - dedi Á. Smaıylov Úkimettiń búgingi otyrysynda.
Sonymen birge, farmatsevtıka – 51%, jeńil ónerkásip – 11%, toqyma buıymdary óndirisi – 25%, munaı óńdeý –11%, hımııa ónerkásibi – 11%, sýsyndar óndirisi – 33%, tamaq ónimderiniń óndirisi shamamen 10%-ke, mashına jasaý 12%-ten joǵary, onyń ishinde lokomotıvter men vagondar óndirisi – 5%, avtomobıl jasaý salasy – 25%-ke ósken.
Taý-ken ónerkásibinde 1,2% ósim qamtamasyz etildi. Qurylys salasy 12,5%-ke ornyqty ósim kórsetip otyr. 1 mln sharshy metrden astam turǵyn úı paıdalanýǵa berildi. Qyzmet kórsetý sektory jyl basynan beri 7,6%-ke ósti. Oǵan saýda, baılanys jáne kólik sektoryndaǵy joǵary dınamıka yqpal etken.
Qańtar aıynyń qorytyndysy boıynsha barlyq negizgi makrokórsetkishterdiń ósýi Qostanaı oblysy men Almaty qalasynda tirkelip otyr. Eń tómen kórsetkishter – Abaı jáne Qaraǵandy oblystarynda.
«Kórip otyrǵanymyzdaı, bıylǵy jyl basy el ekonomıkasynyń serpindi damýǵa baǵyt alǵanyn kórsetip otyr. Ekonomıkanyń osy ósý qarqynyn saqtap qalýymyz kerek.
Bul búgingi geosaıası jaǵdaıda ońaı sharýa emes. Úılesimdi jumys pen tıimdi úılestirýdi ekonomıkanyń barlyq salalarynda qamtamasyz etý kerek.
Іshki naryqty otandyq taýarlarmen tolyqtyrýǵa, shıkizattyq emes ónim kólemin ulǵaıtýǵa basymdyq berilýi tıis. Shaǵyn jáne orta bıznestiń áleýetin keńeıtip, damýǵa jaǵdaı jasaýymyz kerek. Tartymdy ınvestıtsııalyq klımat quryp, ınvestorlarmen belsendi dıalog júrgizý qajet. Investıtsııalardyń qurylymyn qosylǵan quny joǵary taýarlardy óndirý jaǵyna qaraı ulǵaıtý kerek. Dástúrli salalarmen ǵana shektelip qalmaı, joǵary tehnologııalyq óndiristerge de basa nazar aýdarýymyz qajet», - dedi Úkimet basshysy.
Foto: t.me/Kzgovernment