Ekonomıkanyń ósimin qaıta qalpyna keltiretin keshendi jospar ázirlenip jatyr - Memleket basshysy
NUR-SULTAN. QazAqparat – Ekonomıkanyń ósimin qaıta qalpyna keltirý jónindegi keshendi jospar ázirlenip jatyr.
Bul týraly Tótenshe jaǵdaı rejımin qamtamasyz etý jónindegi memlekettik komıssııanyń qorytyndy otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.
«Azamattardy qoldaý men bıznesti damytýǵa arnalǵan osy jáne basqa da sharalardy júzege asyrý úshin Ekonomıkalyq ósimdi qaıta qalpyna keltirý jónindegi keshendi jospar ázirlenip jatyr. Bul jospar jýyq arada bekitiledi. Memlekettik organdar ony júzege asyrýdyń barlyq joldaryn muqııat pysyqtaýy qajet. Sondaı-aq, olar ózderiniń orynsyz áreketteri arqyly bul sharalardyń mańyzdylyǵyn joqqa shyǵarýǵa jol bermeýi kerek. Daǵdarystyń kúrdeli kezeńin qalaı eńseretinimiz, elimizdi jáne ekonomıkany odan ári damýǵa qalaı beıimdeıtinimiz osyǵan baılanysty. Biz daǵdarys saldarynan álemdegi ahýaldyń jáne ulttyq ekonomıkanyń túbegeıli ózgergenin anyq kórip otyrmyz», - dedi QR Prezıdenti.
Memleket basshysy qazirgi ahýal men faktorlar, aldaǵy ózgerister 2025 jylǵa deıingi strategııalyq damý josparynyń jańa nusqasynda eskerilýge tıis ekendigin basa aıtty.
«Josparda ekonomıkany jáne memleketti basqarý isin barynsha jandandyratyn ınstıtýtsıonaldyq jáne qurylymdyq reformalar qamtylýy qajet»,- dedi Qasym-Jomart Toqaev.
