Ekonomıkanyń damýynda barlyq salada oń ózgerister bar - Almaty
ALMATY. 21qańtar. QazAqparat - Almaty qalasy saýda kólemi boıynsha respýblıkada birinshi orynda kele jatyr.
Bul jaıly Ekonomıka jáne bıýdjettik josparlaý basqarmasynyń bastyǵy Sardar Qabdolov búgin Almaty qalasynyń 2012 jylǵy áleýmettik-ekonomıkalyq damýynyń qorytyndysyna arnalǵan májiliste aıtty.
«Ótken jyly 521,5 mlrd. teńgeniń ónimi shyǵaryldy. Bul 2011 jylmen salystyrǵanda 3,3 paıyzǵa joǵary. Onyń ishinde óńdeý ónerkásibindegi ónim óndirý 3-4 paıyzdy qurady. Syrtqy ekonomıkalyq qyzmette de oń ózgerister bar. Taýar aınalymy 11 aıda 16,4 mlrd. AQSh dollaryna jetip, 2011 jyldyń sáıkes kezeńimen salystyrǵanda 16,9 paıyzǵa artty», - deıdi S. Qabdolov. Onyń aıtýynsha, bólshek taýar tutyný 6,7 paıyz ósip, 1 trıllıon 268 mlrd. teńgeni qurady. Kóterme taýar aınalymy 16,7 paıyz ósip, 5 trıllıon 214 mlrd. teńge boldy. Kólik salasynda júk aınalymy 1,4 paıyzǵa, jolaýshylar tasymaldaý 14,3 paıyzǵa artty, bul salalardyń kirisi 10,9 paıyzǵa kóterilip, 358,6 mlrd. teńge boldy.
