Ekonomıkanyń damý qarqynyna ınstıtýttardyń sapasy óz áserin tıgizedi -Ekonomıka ınstıtýtynyń qyzmetkeri
ALMATY. Naýryzdyń 31-i. QazAqparat /Erlik Erjanuly/ - Ekonomıkanyń damý qarqynyndaǵy ekonomıkalyq saıasat pen ınstıtýttardyń joǵarǵy sapasynyń kórsetkishi 2,4 paıyzdy quraıdy. Bul búgin Almatyda ótken «Daǵdarystan keıingi damý: jańa onjyldyqtaǵy jańa múmkindikter» dep atalatyn dóńgelek ústel jıynynda sóz boldy,
dep habarlaıdy QazAqparat.
Bilim jáne ǵylym mınıstrliginiń Ekonomıka ınstıtýtynyń qyzmetkeri Eldar Daýranovtyń aıtýynsha, daǵdarystan keıingi damýǵa jaǵdaı jasaýda alǵashqy kezekte júzege asyratyn birneshe sharalar bar. Olar: iskerlik jáne ınvestıtsııalyq ahýaldy jaqsartý, eldiń qarjylyq júıesin nyǵaıtý, memlekettik basqarýdyń tıimdiligin arttyrý. Al memlekettik basqarý modeliniń jańa qaǵıdattary - nátıjelilik, ashyqtyq jáne qoǵam aldyndaǵy eseptilik bolyp otyr.
«Memlekettik basqarýdyń jańa modeli 2015 jyly qalyptasady. Álemdik tájirıbege qarasaq, memlekettik basqarý reformasy ár ýaqytta árqıly ádispen jasalǵan. Máselen, uzaq merzimdik jalpyulttyq baǵdarlamalar jasaý memleket nemese úkimet basshylaryna esep beretin memlekettik organmen, sondaı-aq mamandandyrylǵan zertteý, konsýltatıvtik jáne oqytý qurylymdary jelisin qurý arqyly jasalǵan. Memlekettik basqarýdyń jańa modelin júzege asyrýǵa Fınlıandııa, Malaızııa, Ulybrıtanııa sııaqty elder 15 jyl ýaqyt jumsaǵan», deıdi ekonomıka ǵylymynyń kandıdaty Eldar Daýranov. Ǵalymnyń sózine qaraǵanda, memlekettik baqylaý ındeksi boıynsha Qazaqstanda ınstıtýttar kórsetkishi jyl saıyn tómendep kele jatyr. Mysaly onda elimiz 2006 jyly - 73, 2007 jyly - 80, al 2008 jyly - 81 oryn aldy.
