Ekonomıkanyń damý qarqynyn saqtaý úshin jumystardy jalǵastyrý qajet - Mamın
ASTANA. QazAqparat - Ekonomıka damý qarqynyn 4 paıyzdan kem emes deńgeıde saqtaý úshin jumystardy jalǵastyrý qajet. Bul týraly Úkimettiń selektorlyq rejimdegi otyrysynda QR Premer-Mınıstriniń birinshi orynbasary Asqar Mamın aıtty, dep habarlaıdy QazAqparat tilshisi.
«Aǵymdaǵy jyldyń 8 aıynyń qorytyndysy boıynsha ekonomıka damýynyń qarqyny ótken jyldyń osyndaı kezeńimen salystyrǵanda tómendedi. Negizinen bul faktor tamyz aıyndaǵy júrgizilgen jumystyń nátıjesi boıynsha qurylyp otyr. Bul aǵymdaǵy jyldyń tamyz aıynyń ındıkatory ótken jyldyń tamyz aıymen salystyrǵanda 6 oblysta tómendedi», - dedi ol.
Birinshi vıtse-premer Pavlodar oblysynda 90,8, Jambyl oblysynda 92,1, Almaty oblysynda 92,5 paıyz, Batys Qazaqstan oblysynda 92,1, Qyzylorda oblysynda 88, 6, Soltústik Qazaqstan oblysynda 91 paıyz tómen kórsetkish tirkelgenin aıtty.
«Tamyz aıy boıynsha ónerkásip óndirisiniń ındeksi 4 paıyzdan joǵary deńgeıge tek 5 aımaq jetip otyr. Olar: Aqmola, Aqtóbe, Atyraý, Shyǵys Qazaqstan oblystary men Shymkent qalasy. Soynmen qatar 8 aıdyń qorytyndysy boıynsha ónerkásip óndirisi ındeksi 4 paıyzdan joǵary deńgeıdi tek alty aımaq kórsetti. Olar: Aqmola, Aqtóbe, Atyraý, Jambyl, Qostanaı jáne Shyǵys Qazaqstan oblystary. Elbasy qoıǵan mindet ekonomıkanyń damý qarqynyn 4 paıyzdan kem emes deńgeıde saqtaý boıynsha jumystardy jyldyń sońyna deıin jalǵastyrý qajet. Bul basymdyqty másele, baqylaýda ustaımyz», - dedi Asqar Mamın.
