Ekonomıkanyń barlyq salalary boıynsha orta deńgeıdegi mamandarǵa degen suranys artyp keledi - G.Ábdiqalyqova
ASTANA. 7 aqpan. QazAqparat /Aıdar Ospanalıev/ - «Jumyspen qamtý - 2020» baǵdarlamasynyń ótken jylǵy qorytyndylary ekonomıkanyń barlyq salalary boıynsha orta deńgeıdegi mamandarǵa degen suranys artyp otyrǵandyǵyn kórsetti.
Bul týraly búgin on-laın rejiminde ótken Úkimettiń selektorlyq májilisinde «Jumyspen qamtý - 2020» baǵdarlamasynyń ótken jylǵy qorytyndylary jóninde baıandama jasaǵan Eńbek jáne halyqty áleýmettik qorǵaý mınıstri Gúlshara Ábdiqalyqova málim etti.
Onyń derekterine qaraǵanda, ótken jyly «Jumyspen qamtý - 2020» baǵdarlamasy boıynsha oqytý tehnıkalyq kásibı bilim berý jumystary negizinen tehnıka jáne tehnologııa, server, ekonomıka jáne basqarý, aýyl sharýashylyǵy salasynyń mamany sııaqty mamandyqtar boıynsha júrgizildi. «Osylaısha baǵdarlama aıasynda 22 myńǵa jýyq adam eńbek naryǵynda úlken suranysqa ıe mamandyqtar boıynsha qaıta daıyndyqtan ótti. Sonymen qatar 3 myń 900 adam biliktiligin jetildirý kýrstarynan ótti. Al jospar boıynsha bul kýrstan 7 myńnan astam adam ótýi qajet bolatyn. Sondyqtan bizge bul baǵyttaǵy jumystardy aldaǵy ýaqytta jetildire túsken abzal»,-dedi mınıstr.
Onyń aıtýynsha, Qyzylorda oblysynda biliktiligin arttyrýǵa barlyǵy 331 adam nemese jospardaǵy kórsetkishtiń 14 paıyzy, Astanadan 327 adam ǵana nemese belgilengen jospardyń 14 paıyzy ǵana jiberilgen. «Jalpy alaǵnda 2011 jyly oqýdy aıaqtaǵan 31 myń adamnyń ishinen bizdiń baǵdarlama boıynsha 16 myń adam, ıaǵnı jartysy ǵana turaqty jumys oryndaryna ornalasty. Jaǵdaıdyń bulaısha sıpat alýyna bizdiń jumysymyzdaǵy kemshilikter de az áser etken joq árıne. Bul rette 2009-2010 jyldar aralaǵynda «Jol kartasy» boıynsha oqýǵa jiberilgen 26 myń adamdy oqytý sharasy da jaǵdaıdyń birshama kúrdelenýine yqpal etkendigin aıta ketý kerek. Alaıda «Jol kartasy» boıynsha bilim alǵan azamattardyń barlyǵy ózderiniń erikteri boıynsha tańdaý jasaǵan edi»,-dedi mınıstr.
