«Ekonomıkany ilgeriletýdiń bir tetigi - bıznes salasyn qarjylandyrý» - respýblıkalyq basylymdarǵa sholý
***
«Egemen Qazaqstan» gazetiniń jazýynsha, Memleket basshysy Nursultan Nazarbaev Ujymdyq qaýipsizdik shart uıymynyń Bas hatshysy Nıkolaı Bordıýjany qabyldady. N. Bordıýja Prezıdentti aǵymdaǵy jyldyń 12 tamyzynda Astanada ótetin UQShU-ǵa múshe memleketter basshylarynyń beıresmı kezdesýine daıarlyq barysy týraly habardar etti. «Nursultan Nazarbaev ıntegratsııalyq protsesterdiń negizin quraıtyn kóptegen qadamdardyń jıi bastamashysy bolyp tabylady. Mysaly, EýrAzEQ qurý - Nursultan Ábishulynyń bastamasy. Ol - UQShU qurýdy usynǵan bastamashylardyń biri. Budan eki jyl buryn Qazaqstanda, Býrabaıda Uıymnyń jedel áreket etý Ujymdyq kúshterin qurý týraly tarıhı sheshim qabyldanǵan bolatyn. Bul sheshimniń bastamashysynyń biri de Qazaqstan Prezıdenti boldy. Bul biz úshin óte jaqsy, óıtkeni Qazaqstanda ótetin mundaı kezdesýler árdaıym naqty jáne qyzyqty sheshimder qabyldaýmen aıaqtalady», - dep atap ótti UQShU-nyń Bas hatshysy kezdesýden keıin jýrnalısterge arnalǵan brıfıng barysynda.
Keshe Ortalyq saılaý komıssııasy ústimizdegi jyldyń 19 tamyzynda ótedi dep belgilengen Qazaqstan Respýblıkasy Parlamenti Senaty depýtattarynyń saılaýyna halyqaralyq uıymdardyń baıqaýshylaryn akkredıtteý týraly máseleni qarady. Osy jaıt arqaý bolǵan maqala «Egemen Qazaqstan» gazetinde «Halyqaralyq baıqaýshylar tirkeldi» degen taqyryppen berildi. Basylymnyń atap ótýinshe, elimizdiń syrtqy saıasat vedomstvosynyń usynysymen Parlament Senaty depýtattaryn saılaý barysyn baqylaý úshin Ortalyq saılaý komıssııasy janynan halyqaralyq uıymdardan 68 baıqaýshy tirkelgen. Sonymen qatar, Senat saılaýyna baıqaýshy retinde qatysý úshin Syrtqy ister mınıstrliginde turaqty negizde 181 sheteldik buqaralyq aqparat quraldarynyń ókilderi tirkelgendigi belgili boldy.
***
Qazaqstandyq kásipkerler aldynda qandaı mindetter tur? Álemdik básekelestik jaǵdaıynda bıznes qalaı jumys isteýi kerek? Osy sekildi san túrli saýaldarǵa «Aıqyn» gazetiniń juma kúngi sanynda «Damý» kásipkerlikti damytý qory» aktsıonerlik qoǵamynyń basqarma tóraıymy Lázzát Erkinqyzy Ibragımova jaýap bergen. «ShOB degenimiz - bul resýrstardyń, arzan nesıelerdiń kúresi emestigin túsiný qajet. Taǵy da qaıtalap aıtamyn, bul - bárinen buryn quzyrettilik kúresi. Eń kúshti basqarý tehnologııalary bar, jetilgen kásibı daǵdyǵa ıe kásipkerler Kedendik odaq jaǵdaıynda da, Biryńǵaı eýropalyq ekonomıkalyq keńistik jaǵdaıynda da barynsha básekege qabiletti bola alady. Sondyqtan barlyq oqý baǵdarlamalary, shetelderdegi taǵylymdama, sheteldik kásiporyndarmen tanysý, tehnologııalardy alyp kelý múmkindikterin úırenýge úlken mańyz beriledi. Jáne olar memleket qazynasynan qarjylandyrylatyn bolady»,- deıdi ol. Suhbat «Ekonomıkany ilgeriletýdiń bir tetigi - bıznes salasyn qarjylandyrý» degen taqyryppen berilgen.
«Astanada ótip jatqan Qazaqstan Prezıdenti kýbogy jolyndaǵy jarystyń ekinshi kúninde «Barys» Habarovskiniń «Amýr» komandasynan 3:4 esebimen utylyp qaldy. Degenmen «Qazaqstan» sport saraıyna jınalǵan jankúıer qaýym elordalyq hokkeıshilerdiń kerek kezinde jeńiske jete alaryna senimdi bolyp qaıtty desek jańylmaımyz. Óıtkeni «Barys» oıynshylary kezdesýdiń sońyna taman esep aıyrmasyn meılinshe qysqartyp, jergilikti kórermenniń kóńiline senim uıalatty»,- dep jazady «Aıqyn» gazeti búgingi nómirindegi «Prezıdent júldesine talas qyza tústi» degen maqalada. Sonymen qatar osy basylymnan sportqa qatysty basqa da qyzyqty maqalalardy oqı alasyzdar.
***
Shyǵys Qazaqstannyń maqtanyshyna aınalǵan maral sharýashylyǵyn tyǵyryqtan alyp shyǵýdyń joly endi tabylǵandaı. Óskemennen 100 shaqyrym jerdegi Prıvolnoe aýylynda ornalasqan kópsalaly «Bagratıon-2» sharýa qojalyǵy qytaılyq ǵalymdar qatty qyzyǵýshylyq tanytyp otyrǵan maral múıizinen qurǵaq kúıdegi «pantomaral» bıologııalyq belsendi qospasyn óndirýmen bilek sybana aınalysýda. Buǵan qosa, keleshekte pantydan tabletka men kapsýla túrindegi ǵajap preparattar shyǵarmaq. Bul týraly «Alash aınasy» gazetindegi «Shyǵystyń bolashaǵy - maral múıizinde» degen maqalada keńinen baıandalǵan.
Osy basylymnyń turaqty «Dat!» aıdarynda «Aq jol» partııasynyń tóraǵasy Azat Perýashevpen aradaǵy suhbat «Aq jol» - qazaqtyń HHІ ǵasyrdaǵy «Alash» partııasy» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Ónerkásip pen óndiristiń úzdiksiz ósimi halyqtyń ál-aýqatynyń jaqsarýyna septigin tıgizedi. Ál-aýqaty jaqsarǵan eldiń densaýlyǵy da, bilimi men óneri, mádenıeti de qaryshtap damıdy. Mundaı jaǵdaıda ulttyń ishki rýhy ózdiginen-aq kóteriledi, halyqtyń ishki áleýeti keńinen ashylady», - deıdi.
***
«Keshe Memleket basshysy Nursultan Nazarbaev Qazaqstan Respýblıkasy Parlamenti Senatynyń Tóraǵasy Qaırat Mámıdi qabyldady», - dep jazady «Kazahstanskaıa pravda» gazeti búgingi nómirinde. Basylymnyń atap ótýinshe, Q. Mámı Prezıdentti Parlament Senatynyń zańshyǵarmashylyq qyzmeti, Senat saılaýyn ótkizýge daıyndyq barysy men aldaǵy kezeńge arnalǵan Palatanyń jumys jospary týraly habardar etti.
