Ekonomıkany damytý úshin jedel tehnologııalyq jańǵyrý júrgizý qajet - Jurynov
ASTANA. QazAqparat - Bul pikirdi QR Ulttyq ǵylym akademııasynyń prezıdenti Murat Jurynov bildirdi, dep habarlaıdy QazAqparat.
«Elbasynyń bul jolǵy Joldaýy bılik tarmaqtary arasyndaǵy ókilettikterdi bólýge qatysty úndeýimen baılanysty órbidi. Onda Prezıdentimiz 5 baǵytta basymdyq jarııalap otyr. Onyń birinshisi jedel tehnologııalyq jańǵyrýǵa qatysty. Bul baıaǵydan aıtylyp kele jatqan jaıt. Biraq, muny endigi ýaqytta jańa deńgeıge kóterip otyr. 2020 jylǵa deıingi ındýstrıaldy-ınnovatsııalyq strategııamyzdy qurdyq. Endi ony jańa beleske kóterip, jedel tehnologııalyq jańǵyrtýymyz kerek», - dedi ol.
Akademııa prezıdentiniń paıymynsha, óndiris oshaqtaryna memlekettiń ekonomıkasyna paıda keltiretindeı jaǵdaılar jasamaı qoǵam alǵa qaraı damymaıdy. Óıtkeni, qoǵamdy damytý úshin qarjy kerek.
«Prezıdent Qazaqstanǵa ekonomıkalyq paıda ákelip otyrǵan birneshe baǵyttardy atady. Ol - taý-ken, munaı-gaz óndirý jáne munaı hımııasy salalary. Bul eki sala bizdiń ekonomıkamyzdyń úshten ekisin berip otyr. Odan keıin aýyl sharýashylyǵy salasy bar. Bizdiń jerimiz baı, aýyl sharýashylyǵyna, mal sharýashylyǵyna qolaıly. Endi sony ıgerý úshin bilim kerek, ǵylym kerek. Bul saladan da Qazaqstan Azııa elderiniń arasynda bilimi men ǵylymy damyǵan memleket», - dedi Jurynov.
Sonymen qatar ol shaǵyn jáne orta bıznesti kúsheıtý qajettigin atap ótti.
«Biz demokratııa kerek deımiz. Demokratııa bolýy úshin halyqtyń 60-70 paıyzy orta býynǵa enýi kerek. Onyń aılyǵynan basqa da tabysy, otbasynda qory bolýy tıis. Shaǵyn jáne orta bıznes 60-70 paıyz bolǵan kezde, olar ózderiniń partııasyn, kásipodaǵyn qurýy múmkin. Mine, sonda demokratııa bolady. Kedeı elde eshqashan demokratııa bolmaıdy. Ony myń jerden Konstıtýtsııaǵa jazyp qoısań da», - dedi ol.
Jurynov jemqorlyqty joımaı birde-bir zań jumys istemeıtindigin de basa aıtty.
«Jalpy, Joldaýda jaqsy-jaqsy jańalyqtar aıtyldy. Endi ony tııanaqty oryndaı alsaq, qoǵam alǵa jyljıdy», - dedi akademık.
